Omathano moondjila onene dhopashigwana moshilongo kage li paveta

ELLANIE SMIT Omathano gokutala ondapo yiiyenditho ngoka taga adhika moondjila oonene dhomoshilongo kage li paveta, ihe okwa tegelelwa ga tulwe paveta mbala.Omukomeho gwoshikondo shekondololo lyoondjila moshilongo, Omupeha kOmufala, Amalia Gawanas, okwa koleke koshifokundaneki shoNamibian Sun kutya omathano ngoka inaga tameka okulonga na okwa tegelelwa ga tameke okulonga moshiwike shotango shomwedhi Desemba. Gawanas okwa popi kutya uuna ga tulwa pamushangwa gwopapangelo, nena omathano ngoka otaga ka tameka okulonga pomahala ga thika po 12 moondjila dhopashigwana moshilongo.Pethimbo sho omathano ngoka ga dhikwa po, oshigwana osha kala tashi popi kutya kage li pamulandu gwoveta yoshilongo, nopethimbo ndyoka opolisi oya holola kutya mboka taya ka kwatwa komathano ngoka taya pogola oompango dhomoondjila otaya ka pangulwa.Omunambelewa ngoka okwa popi kutya ngele ayihe oya manithwa ngaashi tashi pangelwa, nena omathano ngoka otaga ka tameka okulonga moshiwike shotango shaDesemba.Okwa tsikile kutya omageelo ngoka taga ka gandjwa kwaamboka taya ka monika taya hingi ondapo ya pitilila komathano ngoka otaga ka kala ga faathana naangoka haga gandjwa.Moshitopolwa shErongo omathano gaali otaga adhika moshitopolwa shoka, limwe oli li oshinano shookilometa 47 okuya moKaribib okuza mOkahandja, omanga ekwawo tali adhika oshinano shookilometa dhili pokati ko 30 no 40 okuya moSwakopo.Omathano muumbugantu woshilongo otaga adhika pondje yaVenduka, oshinano shookilometa 45 okuya mOveduka okuza moRehoboth.Monooli omathano ngoka otaga adhika oshinano shookilometa 110 okuya mOtjiwarongo okuza mOkahandja oshowo oshinano shookilometa 61 okuza mOkahandja okuya mOtjiwarongo. Otaga adhika woo oshinano shookilometa 70 okuza mOtavi okuya mOtjiwarongo oshowo ookilometa 50 okuza mOtjiwarongo okuya mOtavi.Gamwe natango otaga adhika oshinano shookilometa 45 okuza mOtavi okuya moTsumeb oshowo oshinano shookilometa 40 okuya mOtavi okuza moTsumeb.Ope na omathano ngoka taga adhika oshinano shookilometa 28 okuya mOshivelo okuza moTsumeb, oshowo oshinano shookilometa 36 okuya mOmuthiya okuza mOshivelo, oshowo 42 okuya mOndangwa okuza mOmuthiya.Gawanas okwa popi kutya oshigwana nashi kale sha kotoka unene okuya pethimbo lyiituthi yomatango omanene nomafudho, na otashi ka tseyithilwa uuna omathano ngoka ga tameke okulonga.Okwa pula aakwashigwana ya kale ye na oshinakugwanithwa uuna taya longitha oopate, sho kwa lopotwa nale omaso geli 648 moopate dhaNamibia nuumvo, mokati koshigwana shoka shi na owala aakwashigwana yeli poomiliyona 2.1.Okwa pula oshigwana shiimange kumwe mokukalekapo egameno moopate, opo ku yandwe ekanitho yoomwenyo onga oshizemo shiiponga. Oshiketha hashi ungaunga niiponga yomoondjila shoMotor Vehicle Accident (MVA) Fund osha tula miilonga iinyangadhalwa ya yooloka medhimbuluko lyesiku lyoAfrica Road Safety Day.Iinyangadhalwa mbyoka oya kwatela mo omadheulo geningo lyomainda moondjila.Pokati komasiku 13 gaNovemba sigo 15 gaNovemba, oshiketha shoka osha ningi omadheulo gomainda goondjila mOmbaye oshowo Karibib, nokutala koompango dhomoondjila. Omadheulo ngoka oga kaliwa kaanambelewa yoompango dhomoondjila ya thika po 40 ya za moondoolopa ngaashi Ombaye, Swakopmund, Henties Bay, Arandis, Usakos, Karibib, Omararu, Uis oshowo Otjimbingwe.Ehangano ndyoka olya ningi woo omadheulo gotango moWitvlei. Omiyalu ndhoka dha tseyithwa kehangano ndyoka odha holola kutya pokati komwedhi Januari nomwedhi Kotomba nuumvo, okwa lopotwa omaso 585 ngoka geetithwa kiiponga yomoondjila okuyeleka nomaso 547 ngoka ga holoka pethimbo lya faathana momvula ya piti. Aantu 5 498 oya ehamekelwa miiponga okuyeleka naantu 5 624 mboka ya ehamekelwa miiponga pethimbo lyafaathana omvula ya piti, omanga nuumvo kwa lopotwa iiponga 3 083 okuyeleka niiponga 3 273 ya lopotwa omvula ya piti.

Omathano moondjila onene dhopashigwana moshilongo kage li paveta

Comments

Namibian Sun 2025-05-08

Please login to leave a comment

Omathano moondjila onene dhopashigwana moshilongo kage li paveta

Comments

Namibian Sun 2025-05-08

Please login to leave a comment

Login