Hanse-Himarwa a hala omalunduluko melongo

Ominista yElongo, Katrina Hanse-Himarwa okwa popi kutya uuministeli itawu kiidhidhimikila woo okwaahalandula omilandu noompangu.

Minista okwa popi ngaaka pethimbo a popitha aaniilonga moshikondo shelongo, oshikando shotango nuumvo, pethimbo uuministeli wa pititha oompangela dhawo dho2017/2018 sigo 2021/22.

Hanse-Himarwa okwa popi kutya ndjika omvula yomalunduluko, ta landula moshipopiwa shomupresidende Hage Geingob, ngoka a li a popi kutya omvula yo 2018 omvula yomalunduluko mepangelo lye. Okwa popi kutya oshikondo osha taalela ompumbwe yiiyemo sho omwaalu gwiimaliwa ngoka hagu pewa oshikondo shoka gwa shuna pevi.

Pahapu dhe omatokolo taga ehameke oga ningwa ngaashi okushunitha pevi iimaliwa hayi pewa ooskola, omihandjo oshowo ooprogramma dhokugandja oondya kaanaskola.

Minista okwa popi kutya oolopota ndhoka ya yakula odha holola kutya ompumbwe yiimaliwa oyo tayi etitha eshunitho pevi lyelongo mooskola, na okwa pula aaniilonga yiilonge okukala taya pula komeho nokulongitha uumaliwa uushona mboka wuli po.

Hanse-Himarwa okwa popi kutya okwa gandjwa elombwelo kOmuprima gwoshilongo opo ku shunithwe pevi elongitho lyiimaliwa, nelombwelo ndyoka olya pumbwa okutulwa miilonga meendelelo.

Elombwelo ndyoka olya nuninwa okushuna pevi omwaalu hagu longithwa miipumbiwa yaaniilonga yepangelo ngaashi iifuta yomalweendo oshowo iifuta yomalutayima muule woomvula ndatu twa taalela. Elombwelo otali utha woo eshunitho pevi lyiifuta yomadhengo goongodhi nokutsa omukumo aaniilonga yepangelo ya longele kumwe.

Hanse-Himarwa okwa tsikile kutya okwa pula a ninge iigongi naakomeho yelongo miitopolwa, aakuluntuskola naataleli yelongo, sha landula iizemo yondondo onti 10 oshowo 12, opo ya vule okutula miilonga oompangela dhiitopolwa ko ku vule okuyambulwa po iizemo mbyoka.

Okwa popi kutya okwaaha shangitha omaliko guuministeli omukundu omunene gwa taalela uuministeli natango, na okwa pula aanambelewa mboka ye na oshinakugwanithwa nya tule miilonga omulandu ngoka nuumvo. Okwa popi kutya ope na woo omaiyuvo kombinga yomulandu gwoPerformance Management System (PMS), naaniilonga oyendji inaya shaina natango omatsokumwe ngoka, ta pula opo aaniilonga ayehe muuministeli ya kwashilipaleke kutya oya shaina omatsokumwe ngoka gegwanithepo lyiilonga yawo.

Sho a popi kombinga yomakonaakono moka uuministeli wa monika kutya owa kala tawu kengelelwa oomiliyona odhindji muule woomvula dha piti, sho kwa kala taku futwa aantu mboka kaye shi aaniilonga yoshikondo shoka, minista okwa popi kutya iipotha yuulunga oya patululilwa aafekelwa melyenge ndyoka.

Omakonaakono oga ningwa moshitopolwa shaZambezi oshowo moKavango West noKavango east. Aalongiskola ya thika po 18 oshowo aanambelewa aayalulimambo giiyemo yuuministeli ye li yaali oya tulwa miipandeko omolwa ekengelelo lyuuministeli niimaliwa ya thika poomiliyona 10.

Pahapu dhaHanse-Himarwa omakonaakono otaga ningwa woo miitopolwa yilwe.

Okwa kunkilile aaniilonga moshikondo ya kale ya tonata nokulopota omaihumbato kehe ngoka taga limbilike.

Kombinga yomusindalongo ngoka gwa lundululwa, okwa popi kutya omalunduluko moondondo dhopetameko oga tulwa nale miilonga mo 2015, omanga goondondo dha landulako ondondo onti 8 sigo 9, taga stikile okutameka mo 2017 no 2018.

Omalunduluko gomusindalongo mondondo onti 10 otaga ningwa mo 2019 omanga mondondo onti 11, 2020 oshowo 12 mo 2021.

Okwa popi kutya egandjo lyomayakulo moshikondo olya yelekwa li li pevi noonkondo, sho omapekaapeko ngoka ga ningwa ga holola oopresenda 58, nonando oompangela dhoHarambee Prosperity Plan otadhi utha andola ongushu yomayakulo yi kale poopresena 70 okuya mo 2020.

ELLANIE SMIT