Omumati a dhipaga hekulu nayinakulu mOkavango

Mwene gwomukunda gwaKayeura mOkavango, Markus Haingura, omupambele gwaahokanathani aakahele mboka ya dhipagwa shi nyanyaleka oshiwike sha zi ko, okwa ekelehi kokule omahokololo gopolisi ngoka taga ti omadhipago ngaka otaga kwatakanithwa nuulodhi woonakusa. Okwa ti kutya aakwanezimo oye ehamekwa noonkondo komahokololo kutya uulodhi owo tashi vulika we etitha omaso gaapambele yawo mbaka Aakriste elela. Haingura okwa lombwele ehangano lyoNetwork Media Hub (NMH) ohela kutya omufekelwa momadhipago ngaka gopaali, omulumentu gwoomvula 27 omutekulu gwaakulupe mbaka ya dhipag. Otaku hokololwa a hahala Clemens Hamukwaya (79) nekuya sigo omeso oshowo Maria Mukuve (84), okwa li e ya hahala nekuya kothingo lwiikando oyindji. Oshiningwanima shika osha ningilwa megumbo lyawo momukunda Kayeura moshitopolwa shaKavango Uuninginino, sha ningwa mEtitano lya zi ko. “ AahokanathanAaahokanathanioya dhipagwa shi nyanyaleka noonkondo,” Haingura a ti. “Oshiningwanima shika kape na nande omuntu ta hala okwiitalela ko ye mwene kusho.” Mwene gwomukunda okwa hokolola nkene omufekelwa, ngoka a tegelelwa a holoke lwotango mompangu oshiwike shika, a adhika owala opo e ya po pegumbo, konima owala yomasiku gatatu manga oshiningwanima shika inaashi ningwa. Otaku hokololwa kutya okwa tidhwa kofaalama omolwomaihiumbato ge taga limbilike. Omadhipago ga nyanyaleka Haingura okwa ti kutya omufekelwa okwa ponokele hekulu tango, hanga a teta ko othingo yahekulu. Nopo ihe okwa taukile muyinakulu gwomukulukadhi, e mu hahala lwaali mothingo nalumwe moombati. Otaku hokololwa kutya ekuya olya tindile moombati nomufekelwa omo e li thigi, mwene gwomukunda a ti. Konima yokudhipaga hekulu nayinakulu, omufekelwa otaku hokololwa a li oshimbombo shepungu nokwa yi nomaliko gaantu, mwa kwatela niinima yahe nakumuvala, okuza mpoka okwa fadhuka po e endele nokandjila ha ke enda lwopomulonga. Haingura okwa ti kutya konima yokathimbo omufekelwa okwiilopota ye mwene kopolisi. Olopota ndjoka ya gandjwa kaakonakoni oya holola kutya elalakano kutya okwe shi ningile shike “otali kwatakanithwa nuulodhi mofamili”. Kakele kaashono, aakwanezimo oye ekelehi kokule omapopyo ngaka. “Aahokanathani mbaka oya li Aakriste nohaya gongala poohapu dhaKalunga. Inaya popilwa nenge ya fofodholelwe uulodhi. Oshiyemateka sho opolisi tayi taandeleke ehokololo lya puka nolyaa na uushili,” Haingura a lombwele oshikundaneki shika. Uuhwapindi we uukulu Okwa hokolola woo kombinga yonkalo yomufekelwa ngoka a kala omupiyaganeki. Otaku hokololwa kutya oku na iihokola nale kelelo lyopamuthigululwakalo omolwoshipotha shokuteya egumbo. Oshikwawo, aakwanezimo oye mu lopotele nale konima sho a ale a monithe yinagona oshiponga kekutsi noskrufu nomolwasho a li te mu ningile ishewe omatilitho kutya ote mu dhipaga. “Oku shi wike kutya omukolokoshi, unene tuu kuyinagona, ngoka a li te mu tekula,” Haingura a ti. Haingura okwa ti kutya omufekelwa omuniineya noha nu nayi omalovu nomapangwe. “Aluhe shampa a yona, oha kambadhala e telwe ohenda molwoshoka ye anuwa oshihakanwa, okwa li hi iningitha kutya ota hepekwa nenge e wete iinima yaa wetike kuyalwe,” mwene gwomukunda a hokolola. “Okwa ti wo kutya uumwayinagona opamwe nayigona oya li haye ya mondunda ye uusiku ye mu dhenge. Ashike ndjoka oyo ombepo nonkalo ye yokwaa taamba ko ombedhi.”Onkalo yomegumbo Megumbo ndika omwa li mwa kala aantu yahamano, mwa kwatelwa aahokanathani aakahele mboka ya dhipagwa komutekulu, omufekelwa, nayinagona nuunona uyali hau yi oskola. Frangilda Nehongo (45), yinagona yomufekelwa, oye onkelo yaakulupe mbaka ya li ye na aanona yane noye kwa li te ya sile oshimpwiyu nokulela. Clemens,hekulu yomufekelwa, okwa li moshipundi shuukuluntu, omanga omwanamati, ngoka oye nakuvala omufekelwa, okwa kala kOmbaye. Omufekewa ota kala manga mokakuma nokwa tegelelwa a ka holoke lwotango mompangu oshiwike shika. phillipus@nmh-hub.com.na

Omumati a dhipaga hekulu nayinakulu mOkavango

Comments

Namibian Sun 2025-07-18

Please login to leave a comment

Omumati a dhipaga hekulu nayinakulu mOkavango

Comments

Namibian Sun 2025-07-18

Please login to leave a comment

Login