A fikwa nomagadhi omapyu komukulukadhi gwe

Jacob Katanga (48) oti ipula natango noshiningwanima shoka she mu falitha moombete tagu talwa pothingo, konima sho omukulukudhi gwe ngoka e mu hokana konima yoomvula dha konda po20, e mu tile omagadhi omapyu noku mu fika manga a li a lala. Oshiningwanima shika osha ningilwa megumbo lyawo momukunda Mayara moshitopolwa shaKavango Uuninginino momasiku 22 Juni. Katanga okwa pya nayi noonkondo montulo, kokwooko nomoshipala kashona. Okwa kala moombete mOshipangelo shEpangelo shaRundu konyala uule womwedhi. Ta popi nehangano lyoNamibian Sun mombete ye yuuwehame oshiwike shika, Katanga okwa ti kutya ina fekela nande esiku limwe kutya ondjokana yawo yoomvula 25 otayi vulu okwaadhika komashongo ga tya ngaaka. “Kanda li te vulu okulya uule womasiku gahamano. Omilungu dhandje odha li dha kakatela kumwe. Onda li muuwehame uunene shili,” okwa hokolola ngaaka newi lya gogoma nota hala okulila. Shi ikolela kuKatanga, aahokanathani mbaka oya kala haya nyenyeta ngaa omalupita ngaashi aanandjokana ayehe, ashike ihaya gumathana nande komalutu. “Aanandjokana ayehe konyala ohaya nyenyeta, ashike inandi mu fekela nande ta vulu okulonga iilonga mbika,” okwa ti. Katanga okwa hokolola kutya esiku ndjoka lyoshiningwanima, okwa li a ya a ka teta iiti, konima yokugalukila kegumbo okwa ka kotha po manga. Okwa li a zala ondjatha, nonande a li a tokola e yi hule mo, ine shi ninga we, okwa lala nayo. Omukulukadhi gwe, Maria Namutenya Neromba, okwa li a pita mo megumbo nokwa galuka konale, nokwa tameke ta enyeke omagadhi mombiga. “Okamwetu oke mu mona sho ta enyeke omagadhi, ashike ina ki ipula nasho,” Katanga ti. Manga a kotha, Katanga oku uvu ondjatha ye ya pupyala, ashike ina tala kutya uupyu otau etwa koshike, sigo omagadhi omapyu ge ya pothingo ye nomoshipala. “Opo nda ka tameka tandi luluma noonkondo. Onda kambadhala ndi tonate, ashike omilema owala ndi wete dha siikilila ndje. Okamwetu oka kugu onkugo ta ka kongo omakwatho.” Katanga okwa ti okwa kumwa noonkondo sho u uvu omahokololo kutya moshipangelo ina galuka mo. “Ondi li momwenyo. Otandi yi ngaa, ashike kashi shi oshipu.” Aahokanathani mbaka oye na aanona yaali, osheeli shawo omukadhona gwoomvula 18. Katanga okwa holola kutya uunona wawo uukwawo uyali owa mana oondjenda nale. Omufekelwa gwoomvula 43 okwa mangwa po nokwa holokele mOmpangu yaMangestrata gwaRundu momasiku 26 Juni. Ota tamanekelwa onkambadhala yedhipago. Oshipotha shika oshu undulilwa komasiku 4 Septemba nomakonakono gopolisi otaga tsikile. Oshiningwanima shika osha ningwa konima sho oshigwana sha holola omalimbililo gasho molwokugalulithana uuwinayi kwa vuka ngashingeyi. Petameko lyomwedhi nguka, Kamunsela gwoshikandjohogololo shaRundu Urban Vicky Kauma okwi indile aakiintu ya yande uukolokoshi, wokufika po omagumbo gaantu nenge okuponokela nokulongela aalumentu yawo uuhwapindi. “Iikulumuna mbika ohayi ehameke noonkondo oomwenyo dhetu naantu ayehe ya gumwa konkalo ndjika yamwe ohaya kanitha omaliko gawo,” Kauma okwa popi oohapu ndhoka pethimbo a li ta gandja omakumbyatha kiihakanwa yomulilo yi li 42. Oombashu odhindji hadhi pi koshitopolwa hoka ohadhi fikilwa po owina molwongeyo yaapopepi nawo. Ku Katanga, okwaaluka kwe komwenyo nopalutu otaku pula ethimbo ele. “Kandi shi shoka she mu pwidhula, opo a fike ndje nomagadhi omapyu,” okwi ipula. “Ashike itandi halele nando omuntu a nwe moshitenga shika nda nu.” phillipus@nmh-hub.com.na

A fikwa nomagadhi omapyu komukulukadhi gwe

Comments

Namibian Sun 2026-09-10

Please login to leave a comment

A fikwa nomagadhi omapyu komukulukadhi gwe

Comments

Namibian Sun 2026-09-10

Please login to leave a comment

Subscription Required to Access Content ×

Login

Subscription Required to Access Content