Onandjokwe ya ningi etando lyotango lyoongolo

Muule womasiku gaali, oshipangelo Onandjokwe oshe shi pondola okuninga omatango goongolo ge li gane.

Oshipangelo shepangelo Onandjokwe moshitopolwa Oshikoto lwotango osha li sha ningi oshigongiilonga shi na sha nepango lyoontumba nomasipa, shoka sha eta opo oshipangelo shi shi pondole okuninga omatando ge li gane goongolo, ngoka ga li ga ende nawa.

Oshigongiilonga shomasiku gaali osha li sha ningilwa mo Emirates Hotel mOndangwa okuza momasiku 29-30 Mei 2026.

Moonkundathana dhoka a ningi noNamibian Sun omundohotola ha longele koshikondo shomatando goongolo nomasipa Dr Albertina Nande okwa ti oshigongiilonga oshali sha unganekwa koshikondo shomatando gomasipa moshipangelo shepangelo mOnandjokwe melongelokumwe nehangano lyoNamibian Surgical Society (NSS). 

Okwa ti oshigongiilonga osha li shuunganekwa okweetapamwe aanawino momasipa noongolo okuza kiipangelo yepangelo naambyoka yopaumwene, shoka sha li sha gandja ompito ya longathane, ya longelekumwe osho wo okunawapaleka onkalo yegandja omaakulo.

Sho a li a pulwa kombinga yomwaalu goondohotola dhomasipa ndhoka hadhi longele moshipangelo mOnandjokwe, Dr Nande okwati mongaashingeyi moshipangelo omuna owala oondohotola dhomasipa mbali ndhoka hadhi longo tadhi kwathelwa kaanambelewa yalwe yuundjolowele yaheyali.

Okwa ti oshigongiilonga osha li unene tashi tala ketando lyokupingena po oongolo osho wo okutala kinima yilwe yapamba omasipa noontumba.

Okwa fatulula a ti: “ Shika osho oshigongiilonga shotango shoshikondo shika, moka unene twa li twa tala ketando lyoonto osho wo lyokupingenapo oongolo.” Otwa li wo twa kundathana iinima ya pamba omailongo unene omalongo ga ziilila kaanawino yomasipa noyomadheulo gopalutu.”

Muule womasiku gaali, oshipangelo oshe shi pondola okuninga omatandogo gokutula mo oongolo oompe molutu, ngoka Dr Nande a li a holola kutya ohaga ningwa nelalakano lyokunawapaleka omainyengo, iilonga yoongolo osho wo okuhwepopaleka oonkalamwenyo dhaavu mboka ya li ya mono omatando.

Kakele komatando ngaka ga ne ga enda nawa, okwa holola wo kutya aavu ya konda po-45 onkene ya tegelela etando lyokupingena po oongolo noonto.

Omanga oshikondo sha longekidhwa nawa okuninga omatango goludhi nduka, Dr Nande okwa tsu omukumo kesimano lyokukwashilipalea kutya omatando monakuyiwa otaga tsikile okweenda nawa. Moshingongiilonga omo tuu moka Dr Akutu Munyika, omupevi pelesifente gwehangano lyoondohotola hadhi ningi omatando lyedhina Namibian Surgical Society, okwa dhenge omuthindo kesimano lyokulongelakumwe pokati kiiyakuthilo yuundjolowele osho wo aaniilonga moshikondo shuundjolowele.

Okwa ti: “ Omauwanawa gelongo, omatando geenda nawa osho wo elongelokumwe pokati kaanawino naaniilonga yalwe yuundjolowele otashi ulike epondolo enene onkene otwa tala ko oshigongiilonga shika osha dhenga mbanda notashi gandja efano ewanawa lyondjila ndjoka Namibia e na okweenda monakuyiwa.”

Ngoka a li nale ominista yuundjolowele nonkalonawa yoshigwana Dr Kalumbi Shangula, okwa tsu omukumo aaniilonga yuundjolowele ya konge omikalo tadhi opalele okukandulapo uupyakadhi mboka tayu kateke egandjo lyomaakula lya shewa yo ya hwahwameke wo opo ku monike oonzo dha pumbiwa mokuyula oshigwana tashi pumbwa omaakulo gopaunamiti gongushu.

Ta ningi eindilo ta ti: “ Aaniilonga yuundjolowele ina ya kala ashike ya mwena ya tala omashongo ngoka taga imbi egandjo lyomaakulo gopaunamiti ga shewa, ihe naya kambadhale okugandja omathaneko gawo uuna tashi pumbiwa naaluhe naakambadhale nuudhiginini opo ku monike iiyakulitho, iikwamatungo osho wo oonzo

dha pumbiwa okuyala aavu meudhililo.”

Ngoka a li a popi peha lyoshikondo shomasipa omunambelewa omukuluntu ta kwathele Dr Nduuvu Ndunge Amutenya okwa tseyitha kutya oshigongiilonga shika otashi kala hashi ningwa komumvo kehe.

“Elalakano lyoshigongiilonga shika oshikale ko andola omumvo kehe okulonga, okuholola uunkulungu, elongelokumwe osho wo okugandja omaakulo ga shewa. Otatu ilongekidhile nale oshigongiilonga sha landula, moka tu na einekelo kutya otashi ka kala oshinene shi vulepo pwaashika notashi ka omalunduluko omanene mokati gaaniilonga yuundjolowele naavu, “ ta ti ngaaka.

Aanawino yopaunamiti oya gongala mOndangwa moEmirates hotel moshigongiilonga shotango shi na

sha netando lyomasipa.