NUST mEenhana ya tindi omapopyo gaalongwa ya thigwa pondje konima yo-22h00

Oshitayiputudhilo shopombanda shoNamibia University of Science and Technology (NUST) mEenhana, shoka shi li posenda yomahumokomeho kiitopolwa yokomikunda yoWilliam Billy Mwaningange momukunda Eembaxu moshitopolwa Ohangwena, osha yamukula komananathano ngoka taga taandele kiikundaneki yopankalathano yokomalungula kombinga yaalongwa mboka taku popiwa ya thigwa ya hakalala konima yomakonakono gokwatokeelela.

Oshitayiputudhilo oshi li konyala ookilometa omu-10 okuza kOndobe nosho wo pokati ookilometa omu-15 nomu-18 okuza mondoolopa yaEenhana, ya thikama pokati kondjila yaEenhana nOndobe/Onhuno. Omalimbililo oga eluthilwa kiikundaneki yopankalathano yokomalungula kombinga yomakonakono ngoka taga tsikile sigo owili omulongo gwokwatoka , ku na omapopyo kutya iiyenditho ohayi kondwa okulonga pethimbo lyone yokomatango, shoka hashi thigi aalongwa kaaye na nkene taya shuna komagumbo. Nonando ongawo, Omuwiliki gwoshitayiputudhilo, Ndohotola Lucus Shikulo, okwa dhenge pokati omapopyo ngoka. 

Shikulo okwa lombwele o-Network Media Hub (NMH) kutya iiyenditho ohayi kala po aluhe ya longekidhilwa aalongwa, ya tulwa po pamusholondondo gwomakonakono gawo. "Nonando omakonakono oga longekidhilwa oowili dhokongulohi, iiyenditho ohayi gandjwa owala. Epuko ohali vulu owala okuya po ngele aawiliki yaalongwa oya kala inaa ya tseyitha kutya iiyenditho otayi pumbiwa pethimbo ndyoka. Kaku na ethimbo lya tulwa po lyokuhulitha po iiyenditho yaalongwa, elongekido ohali kala po aluhe," osho a tompele. 

Kombinga yomusholondondo gwomakonakono gopo-22h00, Shikulo okwa yelitha kutya oshitayiputudhilo shaEenhana kashi na ondjo methimbo ndyoka lya tulwa po, shaashi iitayiputudhilo ayihe yoNUST moshilongo ashihe ohayi shanga omakonakono pethimbo ndyoka nelundululo lyomisholondondo ndhika ita li vulu okuningwa.

"Ohela owala, otwa gongala nOkansela kAakalelipo yaAlongwa (SRC) opo tu kundathane omalongekidho giiyenditho. Oye na oshinakugwanithwa shokukwatathana natse opo ku shilipaleke kutya omalongekidho giiyenditho oga tulwa po. Ngele opu na aalongwa ye uvite kutya oya thigwa othika koolefa, naya kwatathane naawiliki yaalongwa yawo opo ya vule okuyakula nomalongekidho giiyenditho," osho a tsu omuthindo.