Oshitopolwa shaShana tashi pewa omayovi N$403 000 goopoloyeka dhomomikunda

Omikunda dhomoshitopolwa shaShana odha thikama dha uka kehumokomeho konima sho epangelo lya pititha iimaliwa yoondola dhaNamibia omayovi omathele gane nagatatu (N$403 000) dhoopoloyeka dhomomikunda momumvo gwopaiimaliwa gwo-2026/2027. Gideon Shitumbuleni, omunambelewa okuza kOshikandjo shoOpoloyeka dhomomikunda mOshana, okwa tseyitha kutya iimaliwa mbika otayi ka topololelwa iikandjohogololo omu-11, moka kehe shimwe tashi ka mona konyala omayovi omilongo ndatu nahamano (N$36 000). Shitumbuleni okwa ningi etseyitho ndika pethimbo lyoshongi shoongundu dhaanambinga ndjoka ya ningwa kEelelo lyOshitopolwa shaShana mEtitatu, nelalakano lyokukundaneka oongeshefa dhomomudhingonoko kombinga yoompito dheyambidhidho lyiimaliwa moshitopolwa. Mokufatulula onkambadhala ndjika, Shitumbuleni okwa tsu omuthindo kutya elalakano lyayo olyo ku yambula po oohandimwe mboka taya zi momikunda nokushunitha pevi ehomo lyaakwashigwana mboka taya tembukile koondoolopa taya kongo iilonga. “Elalakano lyetu olyo ku yambulapo omikunda opo tu shunithe pevi omwaalu gwoohandimwe mboka taya thigi po omikunda yu uka koondoolopa taya kongo oompito oohwepo dhomahupilo,” osho a hokolola. Okwa gwedha ko wo ta ti, omulandu gwiifuta iishona (microfinance) ogwa nuninwa okuyambidhidha oonkambadhala dhoongeshefa dhomomikunda ndhoka tadhi hwepopaleke iiyemo yegwaneno lyopaumwene negandjo lyiilonga. Omulandu ngoka otagu ka yambidhidha iimaliwa yoopoloyeka miikandjo ya yooloka, mwa kwatelwa uunamapya, iilonga yokomake, omalandithilo, oomina, omatalelopo, iilonga yoofabulika, omayakulo gaayenda, iilonga yokutelekela iituthi, iilonga yokuhondja, nosho wo egandjo lyiizalomwa. Kombinga yomwaalu gwiimaliwa, okwa ulike kutya oopoloyeka dhoohandimwe otadhi vulu okupewa iimaliwa okuza poondola dhaNamibia omayovi omulongo (N$10 000) sigo omayovi omilongo heyali (N$70 000), tadhi iithana mboka ye na oomvula okuza po-18 mboka taya zi momikunda ya tule mo omaindilo. Opo dhi gwane okutambulwa, oongeshefa odhi na okukala dha shangithwa Nehangano lyomaishangitho goongeshefa lyo-Business and Intellectual Property Authority (BIPA), dhi kale tadhi vulu okukonakonwa, ishewe odhi na okugandja iilonga kaakwashigwana manga tadhi kwathele mokumona iiyemo. Manga iinima mbyoka tayi ende, omunafaalama gwoondjuhwa Gustaf Uunona okwa nyanene owino we nehangano lyo-Network Media Hub, ta popi kutya okwa monene mo uuwanawa meyambidhidho lyiimaliwa ngaashi ndika momumvo 2015 opo a hwepopaleke iilonga ye yuunamfaalama woondjuhwa. Okwa monene iimaliwa yoondola dhaNamibia omayovi omilongo ntano (N$50 000), mbyoka a longitha mokulanda eshina lyokutenditha omayi (incubator), okashina kolusheno (generator), iitungitho yokutunga oshikuku shoondjuhwa, nosho wo olusheno. Mokutameka owala noondjuhwa omilongo ntano, okwa yambulapo uunafaalama we sigo okonyala oondjuhwa dha thiki pomayovi gaali.Kombinga yomalandithilo, okwa ndhindhilike kutya ompumbwe yoondjuhwa onkene ngaa tayi tsikile okulonda omolwiituthi noohandimwe mboka haya landa oondjuhwa opo ye ke dhi landithe ishewe.Uunona okwa ladhipike yalwe mboka taya kongo eyambidhidho lyiimaliwa yoopoloyeka dhawo opo ya toole po ompito ndjika, ta tompele kutya otayi vulu okukala ompito ombwaanawa lela koohandimwe mboka ye na omadhiladhilo goongeshefa ga thikama, molwashono iimaliwa mbika itayi pula okushunithwa.

Oshitopolwa shaShana tashi pewa omayovi N$403 000 goopoloyeka dhomomikunda

Comments

Namibian Sun 2026-10-22

Please login to leave a comment

Oshitopolwa shaShana tashi pewa omayovi N$403 000 goopoloyeka dhomomikunda

Comments

Namibian Sun 2026-10-22

Please login to leave a comment

Subscription Required to Access Content ×

Login

Subscription Required to Access Content