Omankolo omi-22 gaali paveta ga kuthwa po moshitopolwa Ohangwena

Oshikongo shokuhanagulapo oondhalate ndhoka dha dhikwa moshikandjohogololo Okongo, moshitopolwa shaHangwena dhaa li paveta otashi tsikile, nomankolo omi-22 oha haganulwa po okuza omwedhi gwa zi ko.

Dhika dhimwe dhomoonkambadhala dhepangelo okukondjitha omaihumbato gokwiikuthila evi koohandimwe shoka hashi eta omukundu omunene miitopolwa yomavi gaayehe nomoompito dhimwe oashi eta oontamanana dhi na sha nevi unene tuu miitopolwa yokonooli.

Omutiyaliwiliki muuninisteli wuunamapya nuuniimuna, oohi, omeya netendululo lyomavi, Paulus Amaambo pethimbo ta gandja olopota yankene uuministeli wa longo komumvo okwa ti; Omutumbawiliki tagu tonateli evi lyokomikunda ogwi ipyakidhila nokutalulula omankolo ga adha po-97 ngoka taku fekelwa ga tulwa po shaa li paveta.

Okwa tegelelwa ku ka ningwe etokolo lyapamba oondhalate dhika.

Amaambo okwa tsu omuthindo kutya oondhalate adhihe dha tulwa po shaa li paveta otadhi ka kuthwa po uuna omilandu adhihe dha tulwa po dha landulwa.

Okwa fatulula tati uuna enkolo lya tothwa mo li kuthwe po, mwene gwalyo oha tseyithilwa pambelewa opo e li kuthe po. Uuna a ndopa okwiiyutha kelombwelo ndyoka lya gandjwa ketonatelongundu lyevi lyokomikunda, etonatenolongundu nena oha li kutha po enkolo ndyoka noonzo adhihe dhopashimaliwa dha longithwa odhi na okufutwa kumwene gwenkolo olyo tuu ndyoka tashi vulika nokuli a patululilwe oshipotha.

Oshinima shokutula po oondhalate shaali paveta osha kala omukundu omunene miitopolwa yaayehe konooli yoshilongo, moka aangekeli naayamba oyo unene taya tula omahala omanene momankolo, shoka hashi eta pu thigale ehala eshona lyuulithilo waayehe.

Oshinima shika osha eta oontamanana nomananathano pokati koohandimwe, omikunda osho wo omalelo gopamuthigululwakalo miitopolwa Ohangwena, Omusati, Oshana nOshikoto.

Shimwe shomiiningwanima sha li sha uvike oshilongo ashihe, oontamanana dha li dha holoka moshitopolwa Oshikoto momasiku 2 Januali 2026, moka mwene gomukunda Onelago Sam Nepando a li a yahwa nokuhulitha molwa tuu oontamanana dhokugwedhela enkolo shaa li paveta.

Omufekelwa Sinkus Johannes, okwa li a yaha Nepando osho wo okumonitha oshiponga mwene gomukunda Iikokola I-Ben Nashandi, pethimbo lyiihokolola momukunda Iikokola.