Hamutenya a yambidhidha aanona taya lumbu nomaulema

Pethimbo kwa dhimbulukiwa Esiku lyAanona mUuyuni momasiku 20 gomwedhi nguka, Ennio Hamutenya okwa talelepo pamwe nominista Netumbo Nandi-Ndaitwah endiki lyaanona taya lumbu nomaulema ga yooloka lyoDr Frans Aupa Indongo Care Centre nokugandja oshimaliwa shooN$100 000 sha nuninwa okuyambidhidha aanona mboka.

Endiki ndyoka otali adhika mOkandjengedi mOshakati na olya kala miilonga uule woomvula 20 monena.

Aanona ya thika po 69 oya shangithwa nendiki ndyoka ihe omolwa ompumbwe yomakwatho otali sile owala oshisho aanona ye li 25.

Hamutenya ngoka e li omunangeshefa okwa popi kutya okwa kala nohokwe yokugandja omayambidhidho unene sho shuuka pehulilo lyomumvo.

Okwa tsikile kutya okwa li a tseyithilwa komupeha minista Emma Theofilus kombinga yendiki ndyoka , naasho a talelepo omandiki ga yooloka ta tala kombinga yoompumbwe dha taalela omandiki ngoka, okwa tokola okugandja eyambidhidho kendiki ndyoka.

Okwa popi kutya shoka kashi shi oshinima teshi ningi owala lumwe, ihe ota tsikile okukala ta gandja omayambidhidho komandiki unene ngoka geli mompumbwe,

Nonando endiki ndyoka olya shangithwa nuuministeli wuundjolowele ihali mono eyambidhidho okuza kepangelo na oliikolelela owala momayambidhidho nomakwatho okuza kaasihenda oshowo aavali yaanona mboka yeli mendiki ndyoka.

Omusilishisho nomutotipo gwendiki ndyoka, Aili Shilongo okwa holola enyanyu lye sho aayenda taya talelepo endiki ndyoka nokugandja woo omayambidhidho. Aanona mboka ohaya pewa elongo omanga yamwe oya pumbwa woo ekwatho lyowina molwaashoka ihaya vulu okulya kuyoyene.

Hamutenya okwa ningi oshitopolwa shaamboka taya gandja omayambidhido meyambulepo unene lyaanona mboka taya lumbu nomaulema.

“Ngame ondi na eitaalo enene menkondopeko lyaanangeshefa aashona nomokushininga otandi kondopeke oshigwana. Shoka osho tatu ningi oombangi musho nena. Ano uuna aantu oyendji taya ondopekwa paliko, nena aantu oyendji otaya mono woo uuwanawa mwakwatelwa aanona mboka yeli mompumbwe,” Nandi-Ndaitwah a popi.

Nandi-Ndaitwah okwa pandula noonkondo Hamutenya omolwa etokolo lye okuyambidhidha endiki ndyoka ta popi kutya otashi ulike eitulemo lye mokukalekapo uuwanawa wAaNamibia.

Okwa pula kutya okwa tegelela ooEnnio Hamutenya oyendji mboka ya pyakudhukwa okutopola shoka ye na nAaNamibia yakwawo.

Okwa pandula woo omutotipo gwendiki ndyoka oshowo aayambidhidhi naakwatheli pendiki omolwa oshilonga oshiwanawa shoka taya longo.