Zim se 211 lopies te veel vir die Eagles

‘n Vennootskap van 124 lopies om die eerste paaltjie het gister die weg gebaan vir die Zimbabwe Chevrons om Namibië met 33 lopies te oorskadu in gister se eerste internasionale T20-wedstryd van die toer in Bulawayo.Die nasionale krieketspan, die FNB Eagles, is in die buurland waar beide spanne voorberei op die komende ICC T20 Wêreldbeker-uitduntoernooi later vandeesmaand waar twee uit agt Afrika-spanne sal deurdring na volgende jaar se wêreldtoernooi.Die jong Zimbabwiese aanvangskolwers – die 21-jarige Brian Bennett en 23-jarige Tadiwanashe Marumani – het die skaal in die tuisspan se guns geswaai met hul vennootskap van 124 lopies. Die twee was byna binne trefafstand van hul nasionale T20i-rekordvennootskap om die eerste paaltjie (145 teen Seychelles in Oktover verlede jaar).Bennett het sy hoogste T20i-kolftotaal van 94 lopies (51 balle; agt viere, vier sesse) aangeteken en is later as speler van die wedstryd aangewys. Hy het sy honderdtal misgeloop toe hy met ‘n skephou die bal oor die paaltjiewagter se kop wou lig, maar deur die einste Zane Green uitgevang is.Marumani was die eerste man wat moes terugstap, toe hy Namibië se jong Alexander Volschenk se boulwerk wou aanval en deur Nicol Loftie-Eaton uitgevang is vir 62 van 48 balle (6x4 2x6).Die kombinasie van Volschenk as bouler en Loftie-Eaton se vangskoot het ook met die volgende kolwer klaargespeel, maar nie voordat Zimbabwe se Ryan Burl twee viere en twee sesse gemoker het nie (22 van nege balle).Die Chevrons se kaptein Sikandar Raza het gevolglik ná 16.4 boulbeurte by Bennett aangesluit en het die hoë kolftempo met twee viere en ‘n ses help volhou (23 nie uit nie van elf balle; 2x4 1x6).Van die Eagles se boulers het Volschenk met 2/43 in sy vier boulbeurte geëindig. Teen ‘n koers van presies nege lopies per boulbeurt vir JJ Smit (0/36 in 4) en Nicol Loftie-Eaton (0/9 in 1) was dié die die enigstes wat nie met dubbelsyfers in dié kolom geëindig het nie.Die vereiste kolftempo van 10.6 per boulbeurt het ‘n groot taak van die Namibiese kolwers geverg – veral met die tydige deurbrake wat die Zimbabwiese bouleenheid gelewer het.Die Eagles se topvyf kolwers Malan Kruger (13 van 13 balle; twee viere), Jan Frylinck (21 van 13 balle; 3x4), Nicol Loftie-Eaton (38 van 24 balle; agt viere), Gerhard Erasmus (26 van 19 balle; 2x4 1x6) en Zane Green (33 van 27 balle; 3x4) het almal uit die blokke gekom voordat hul aanslag kortgeknip is.JJ Smit is vir 2 lopies van 4 balle uitgevang, terwyl die stryd basies reeds gewonne was teen die tyd dat Ruben Trumpelmann (20 van 9 balle; 1x4 2x6) en Dylan Leicher (11 nie uit nie van 9 balle; 2x4) weerstand probeer bied het.Wellington Masakadza (1/23 in 4) se boulekonomie was loshande die beste in die wedstryd, terwyl die hemelbesem Blessing Muzarabani (2/38 in 4) en die kaptein Sikandar Raza (2/31 in 4) elkeen twee deurbrake gemaak het.Wedstryde 2 en 3 in die reeks van drie internasionale T20-wedstryde word vandag en Donderdag by die Queens-sportklub in Bulawayo beslis.

Zim se 211 lopies te veel vir die Eagles

Comments

Namibian Sun 2025-09-16

Please login to leave a comment

Zim se 211 lopies te veel vir die Eagles

Comments

Namibian Sun 2025-09-16

Please login to leave a comment

Login