Unam oor ‘n emosionele hekkie in Khomasdal

FNB Unam-rugbyklub se eerstespan het Saterdag by Suburbspark in Khomasdal sy derby teen FNB Western Suburbs met 28-7 beklink.Unam het vier verdoelde drieë behaal en Suburbs een. Die studente is na dese sesde en die Khomasdallers agtste uit nege spanne.Dit was die besoekers se derde wedstryd in die Namibië Rugby-unie se 2026 premierligaseisoen, terwyl Suburbs in hul vierde kragmeting gespeel het.Vir Unam was dit ‘n emosionele eerste verskyning op die veld sonder wyle Graham April (30), hul staatmakerstut wat die vorige langnaweek in ‘n padongeluk omgekom het.Suburbs het vanaf die afskop lus gelyk vir rugby en het uitstekende druk toegepas. Hul linkervleuel Jamal Fisch het binne die eerste paar minute vir sy span se enigste vyfpunter die doellyn oorgesteek. Losskakel Wyatt Brooks was sekuur met sy doelskop.Die gasheerspan het ‘n hoë tempo gehandhaaf en was ongelukkig om nie meer punte in veral die eerste helfte te behaal nie. Unam het egter die druk verwerk en Kee-shan Beukes, hul regtervleuel, het die telbord vir sy span aan die gang gekry. Geraldo Beukes (losskakel) het die telling 7-elk met sy doelskop gemaak.Nog twee drieë het vir Unam gevolg om hulle rustyd met 21-7 te laat voorloop het. Suburbs het in die tweede helfte vir Unam beperk om net sewe punte te kon byvoeg.Alcino Isaaks, kaptein van Unam, het gesê: “Dit was ‘n moeilike wedstryd, maar die ouens het teruggekom om te wen. Ons het gedink ons gaan net opdaag en ‘n maklike sege bewerkstellig. Suburbs het egter met vurigheid gespeel en ons hard laat werk.“Ek reken die res van die seisoen behoort goed te verloop, want die spelers is konstant. Graham April se afsterwe is egter baie emosioneel en ‘n groot verlies vir ons. Hy was ‘n medekaptein, ‘n vriend en familie.”Jood Oppernan, afrigter van Suburbs: “Unam het goed gedoen om te wen nadat ons uitstekend weggespring het. Ons het in 2025 hierdie derby gewen, maar is besig met ‘n opboufase wat ‘n ruk gaan neem.“Ons klub het ‘n groot tekort aan stutte. Ek probeer van die jonger spelers vir dié posisie grootmaak. Ons stutte moes vandag vir 80 minute speel wat ongewoon is. Ek reken ons manne het werklik goed gevaar. Ek haal my hoed af vir Unam wat die druk verwerk het om te wen.“Daar is wel lig in die tonnel vir ons. FNB Wanderers sal vroeg aanstaande maand ons volgende teenstander wees.”David Philander, afrigter van Unam: “Die emosies was vandag hoog sonder Graham. Ons het nie die wedstrydplan uitgevoer soos ons wou nie. Ons was ‘n paar keer geskrum en die lynstane was 50-50. Die spelers het gesukkel om in die wedstryd te kom en ritme te kry.“Suburbs het goed gespeel. Ons moes heeltyd op kruisverdediging konsentreer, want hulle was die heeltyd in ons gesigte.“Ons sal binnekort van die nasionale o.20-spelers verloor as hulle gaan toer, maar die manne is opgewonde oor die res van die seisoen.”Danie Koen het die fluitjie in die skoon en aanskoulike botsing hanteer.Puntemakers:Unam: Drieë deur slot Viery Haufiko (2), vleuels Kee-shan Beukes en Aljarreau Zaahl. Doelskoppe: losskakel Geraldo Beukes (4).Suburbs: Drie deur linkervleuel Jamal Fisch; doelskop deur losskakel Wyatt Brooks. ReserweligaUnam II klop Suburbs II met 71-19. Die studente het 11 drieë gedruk (vier deur linkervleuel Sheilano Besser) waarvan agt verdoel is (sewe deur Nazume Swartz). Die tuisspan druk drie keer en was suksesvol met twee doelskoppe.– tielman5.tvl@gmail.com

Unam oor ‘n emosionele hekkie in Khomasdal

Comments

Namibian Sun 2026-05-11

Please login to leave a comment

Unam oor ‘n emosionele hekkie in Khomasdal

Comments

Namibian Sun 2026-05-11

Please login to leave a comment

Subscription Required to Access Content ×

Login

Subscription Required to Access Content