Reho Falcon groet jarelange mentor

Gedurende Vrydagoggend 30 Mei moes Namibië ná ‘n noodlottige hartaanval van een van sy geliefde rugbyseuns afskeid neem. Christopher Alexander (60), ook bekend as Kappies, laat sy vrou Ronel, twee dogters Cailan en Aimee en seun Duane na. Laasgenoemde was vanjaar die eerstespankaptein van FNB Reho Falcon, waar sy pa ook oor jare as afrigter en administrateur groot insette gelewer het. Hy was vanjaar die klubsekretaris.Christo was in sy fleur ‘n vegter op senter, ‘n gerekende afrigter, ‘n wyse onderwyser en rugby-administrateur, asook ‘n boer en ‘n pa duisend vir sy familie. Hy was ‘n boorling van Victoria-Wes in die Karoo, waar die oud-Springboksenter Mannetjies Roux ook gebore is. Christo was in 1999 en 2003 deel van die afrigtingspan van die Namibiese senior nasionale span na sy eerste twee Wêreldbekertoernooie, in onderskeidelik Frankryk en Australië, geneem het.Hy was ook afrigter van die o.18 Cravenweekspan en in twee senior toetse teen Marokko en Madagaskar was hy ook in beheer, voordat hy later die bestuurder van ontwikkeling by die Rugbyunie was. Die man met die rugbybrein, is hy in sommige kringe genoem, asook die saggeaarde familieman. Hy was geken aan sy sin vir geregtigheid, veral by Tisan nasionale en senior rugby spanne asook die dae van Nanru, in die dae toe die kleurfaktor nog ‘n struikelblok was. Kappies se dood het nie net in Namibië hartseer gebring nie, maar ook in Suid-Afrika van waar die gewese Springbokafrigter Peter de Villiers in ‘n e-pos laat weet het die twee was boesemvriende.“Sy heengaan is ‘n groot verlies vir rugby en vir die Alexander-familie. Christo was ‘n besonderse mens, hy is ‘n vriend, een van die min. Hy is uniek en spesiaal uitgekap deur God self as Sy ambassadeur om vir ons te wys waaroor God se liefde gaan. “Dis so moeilik omdat daar nie ‘n woordeskat bestaan om reg te laat geskied aan wie Christo rêrig was nie.“Ek besef sy sitplek is leeg aan die tafel, in die bed, by die kerk, in die raadsaal, by die skool, of op die plaas, maar in ons harte sal dit vol bly.” De Villiers onthou Kappies ook in sy rugbydae: “Daar is sekere spelers wat ‘n afrigter net nooit kan vervang nie as gevolg van sy uitstaande talent, voorgevoel en integriteit. Christo was so ‘n speler. Maar hy is nou waar hy wil hê sy familie moet ook eendag kom. “Rus sag, my vriend, jy het my alweer gewen; ek verlang om te wees waar jy is.”Uit Kaapstad het Retha en Pieter Schoeman ook van hulle laat hoor. Die Schoemans besit ‘n klerefabriek in Kaapstad en het verlede jaar saam met Christo en Duane ‘n besigheid begin.”“Duane, ons is geskok en baie jammer om te hoor van jou pa se ontydige sterfte. Die paar gesprekke wat ons met hom gehad het, het ons ‘n merkwaardige man gevind. Ons sal hom beslis mis.” Sas Bailey, ‘n oudadministrateur van SA Rugby en Wêreldrugby, het in e-posboodskap gesê: “Woorde ontbreek oor die skielike heengaan van Christo Alexander. Mag jul pyn en verlies versag word deur die vele aangename herinneringe. “Hy was ‘n persoon met rotsvaste beginsels, wat vreesloos vir nie-rassigheid, menswaardigheid en gelyke geleenthede vir die onderdrukte en agtergeblewe gemeenskappe geveg het. ‘n Man wat in die arena geklim het en soms teen ‘n oormag van weerstand teen veranderinge en transformasie moes stoei. “Rus in vrede Christo, jy het die stryd gestry en die wedloop hier op aarde met waardigheid voltooi.”Die begrafnis sal komende Saterdag (13 Junie) om 10:00 by die Rynse Moedergemeente op Rehoboth wees.

Reho Falcon groet jarelange mentor

Comments

Namibian Sun 2025-06-16

Please login to leave a comment

Reho Falcon groet jarelange mentor

Comments

Namibian Sun 2025-06-16

Please login to leave a comment

Login