Oorsese spelers hier voor toer na Dubai

Die nasionale rugby-oefengroep is ernstig aan die voorberei vir Wêreldrugby se finale kwalifiserende toernooi (8-18 November in Dubai) waar die 24ste en laaste beskikbare plek vir die 2027 Wêreldbekertoernooi in Australië bevestig sal word. Die Namibiërs het ‘n groot taak voor hulle in die bepalende toetse teen België (8 November), teen Samoa vyf dae later en teen Paraguay op 18 November. Spelers van oorsese klubs in Europa en die VSA, asook van unies in Suid-Afrika het hulle reeds by die plaaslik gebaseerde groep in Windhoek aangesluit. As deel van die spelers se openbare betrekkinge het die hakers Edward Drotsky en Gianluca Savoldelli, slotte Oliver Kurz en Johan Luttig, skrumskakel Helarius Kisting en losskakel André van der Berg vandeesweek Novel Motor Company se bekendstelling van sy nuwe Ford Turneo Trend-bussie bygewoon. Die NRU het aan die einde van April vanjaar vir Novel Motor Company as sy nuwe borg vir voertuie bekendgestel. Teen gister was geen aanduiding nog gegee wanneer die NRU se aankondiging van die toergroep van 30 spelers na die Emirate gedoen sou word nie. Die Welwitschias beoog een opwarmwedstryd teen die Boland Kavaliers op Wellington op 1 November voor hul toer.