Moria Bere deur na droomfinaal teen WHS

Die eerste rugbyspan van OK Foods Moria Privaatskool het 'n nuwe inskrywing in die geskiedenisboeke gemaak deur vir die eerste keer sedert die skool se ontstaan in Januarie 1991 tot die eindstryd van die Namibië Hoërskolerugby (NSSR) onder 19 Superliga deur te dring.Geskiedenis gemaakMoria se voorganger, Hoërskool Outjo, het ‘n leeftyd gelede drie keer in eindstryde verloor, naamlik in 1969 (met 3-6 teen P.K. de Villiers van Keetmanshoop), in 1971 (met 0-6 teen WHS) en drie jaar later teen Hoërskool Walvisbaai (4-13).In ‘n meer onlangse oplewing het DJ Holtzhausen se span van 2018 die verbeelding aangegryp met hul vreeslose hardlooprugby, totdat Windhoek Affies hulle in die semifinaal met 40-30 gestuit het.IntensiteitDie indrukwekkende wyse waarop die Bere hul semifinaal teen die gedugte King Price Windhoek Gimnasium met 39-34 beklink het, sal as ‘n tydige waarskuwing vir die titelhouer Samsung Windhoek Hoërskool dien, wat ook sy plek in komende Saterdag se hoogtepunt verseker het deur Compack Tsumeb Gimnasium met 34-15 te oorskadu.Windhoek Gimnasium is in enige terme ‘n swaargewig opponent, wat egter gereeld op die agtervoet gedwing is deur die intensiteit wat die span van Outjo opgedis het.Dit was ‘n aksiebelaaide wedstryd wat toeskouers op hul voete gebring het met verspeelde kanse aan beide kante – soos toe Gimnasium se agtsteman en kaptein Vincent Scholtz binne die eerste minuut ná rustyd die bal aangeslaan het terwyl hy in ‘n duikvat sy arm uitgestrek het om die drie te druk.Vir Moria was die sekuur geplaaste taktiese skoppe deur sy skrumskakel Du Rand Louw ‘n strategiese wapen. Een so ‘n skop ná 16 minute is deur sy heelagter en kaptein Franko Engelbrecht volspoed agterna gesit, wat die bal net-net aangeslaan het met niemand voor hom nie.Nog een van Louw se taktiese skoppe uit sy eie helfte het ná 31 minute wel vir linkervleuel Drikus Maartens reg gewip, wat twee dekverdedigers in ‘n resies na die linkerhoek geklop het.Die Gim Leeus was eerste met 5-0 voor met flank Lihan Horn se drie vanaf ‘n lynstaandryf. Ná 22 minute was die spanne op 8-8 gelyk, met Moria se vaskopstut Wian Maartens wat van naby oorgedry het.Teen rustyd het Moria nog twee verdoelde drieë bygevoeg om met 22-8 voor te loop. Die Bere se punte in daardie stadium was drieë deur die Maartens-broers en flank Keyo Kruger, twee doelskoppe en ‘n strafdoel deur senter Bertus Narib.Moria se volgende trefhou ná rustyd was ‘n drie deur agtsteman Armand Esterhuizen, verdoel deur Narib (29-8).Gimnasium moes reageer en met konstruktiewe opbouwerk het regtervleuel Oliver Seager met sy krag ‘n beweging na die linkerkant gaan afrond. Senter JD Jankowitz se doelskop het die verskil laat krimp, maar Moria se vasbeslotenheid het op nog ‘n dryfmaaldrie deur flank Ben Mostert uitgeloop (36-15).Die gehalte van die Gim-span moes na vore kom en drieë deur haker Jayvin du Plessis, slot Buhlem Oelofsen en Lihan Horn se tweede van die dag het die Windhoekers tot op 36-34 teruggebring in die tydperk wat Moria se slot Romario Hoeseb ‘n geel kaart moes uitdien.Moria-ondersteuners het weer gejuig toe Bertus Narib onder die pale oorgeduik het vir ‘n “drie” wat nie toegeken is nie, maar ‘n strafskop is wel toegeken waarmee dié senter die eindtelling 39-34 gemaak het.WHS Koedoebulle seil voortCompack Tsumeb Gimnasium (vierde) het uiteindelik nie oor genoeg diepte beskik om WHS as heersende kampioen te onttroon nie.Die onoorwonne voorloper op die ligastand het in geen stadium werklik na sy hoogste ratte oorgeskakel nie, maar was rustyd met 15-3 voor en het met 34-15 gewen.Tsumeb se losskakel FJ Fourie het sake met ‘n strafdoel geopen, maar hy het voor rustyd die veld met ‘n besering verlaat.Die Koedoebulle het die eerste helfte met drieë deur skrumskakel Dominique Isaacs en sy kaptein Pieter-Jan Strydom afgesluit, asook ‘n strafdoel en doelskop deur losskakel Mc-Rein van Wyk – alles reeds binne die eerste 14 minute. Die agtsteman Strydom se drie was verspot maklik, toe hy van ‘n vyfmeterskrum regs om gebreek en geen verdediger voor hom gesien het nie.Tsumeb het in die tweede helfte moedig teruggeveg vir drieë deur agtsteman en kaptein Russel Bartlett en vaskopstut Jurick van der Berg, maar WHS het ook sy telling met drie drieë opgestoot.Isaiah Kazondovi het sy drieë ná 39 en 40 minute ingeryg – die eerste van konstruktiewe opbouwerk deur sy flankmaat Lorenzo Awaseb en haker Carel Louw ná ‘n lynstaandryf. Van die afskop af het plaasvervanger-linkervleuel Caleb Buys uit sy kwartgebied reguit deur genael en een speler op hom getrek voor hy Kazondovi pale toe gestuur het. Mc-Rein van Wyk het beide verdoel.Caleb Buys het vir sy drie in die linkerhoek oorgeduik.&bull; Volledige uitslae van die My Zone NSSR halfeindstryde op bladsy 2 vandag.

Moria Bere deur na droomfinaal teen WHS

Comments

Namibian Sun 2025-09-03

Please login to leave a comment

Moria Bere deur na droomfinaal teen WHS

Comments

Namibian Sun 2025-09-03

Please login to leave a comment

Login