Keurkomitee hou voet by stuk oor Sternagel-beslissing

Die MXoAN 2026 keurkomitee en organiserende komitee, asook Windhoek Motocross-klub het in ’n gesamentlike reaksie uitgewys dat Mark Sternagel vrywillig aan die Namibië-span onttrek het.“Ná sy onttrekking en sy daaropvolgende versoek om die besluit te heroorweeg, is aansienlike tyd en moeite bestee in samesprekings oor die moontlikheid om hom weer in die span op te neem.“In teenstelling met die indruk wat nou geskep word, is die deur nie bloot toegemaak nie. Mark het verskeie geleenthede gekry om terug te keer en sy verbintenis tot die Namibiese span, die sport en die ontwikkeling van motorfiets-veldrenne (motocross) in Namibië te bewys.“Dis dus verkeerd om die indruk te skep dat die voorwaardes vir herinsluiting ten volle aanvaar is, dat daar daarna aan alle vereistes voldoen is, en dat Mark desondanks die kans geweier is om Namibië ná sy onttrekking te verteenwoordig.“Wat gevolg het, was ’n poging om sekere ooreengekome verpligtinge te ontduik, eerder as om dit na te kom soos ooreengekom.” Individuele inskrywing“Dis ewe belangrik om die posisie rakende Mark se daaropvolgende versoek om as ’n individuele renjaer (met ’n wit nommerbaadjie) deel te neem, op te klaar.“Die FIM Africa Motocross of African Nations is in die eerste plek ’n kampioenskap vir nasionale spanne – dis nie ’n individuele kampioenskap nie. Die deelname van individuele renjaers is aanvullend tot die amptelike nasionale spanstruktuur en is onderhewig aan die goedkeuring en magtiging van die betrokke renjaer se federasie.“Namibië se amptelike kwota vir die MX1-klas is nog nie voltallig nie, en daar is steeds plekke beskikbaar binne die nasionale spanstruktuur. Mark se versoek om as ’n individuele deelnemer (met ’n wit nommerbaadjie) deel te neem, is gevolglik nie goedgekeur nie.“Mark is nie ’n jaer wat oor die hoof gesien, of wat nooit vir Namibië gekies is nie. Hy is wel gekies, het sy insluiting aanvaar en daarna vrywillig onttrek. Die feit dat hy nie daarna heringesluit is nie, skep nie ’n outomatiese reg om as individuele deelnemer deel te neem nie, en bied ook nie ’n alternatiewe roete verby die nasionale span se keuringsproses nie.” Verantwoordelikhede“Die keurkomitee het ’n plig om konsekwent en in die beste belang van die hele Namibiese span en die sport op te tree – nie net ’n enkele individu nie.“Om Namibië te verteenwoordig is ’n voorreg. Dit bring verantwoordelikhede mee wat verder strek as om bloot die vinnigste jaer by die wegspringhek te wees. Toewyding, gedrag, spanwerk, professionaliteit, betroubaarheid, samewerking en ’n bydrae tot die ontwikkeling van die sport maak alles deel uit van daardie verantwoordelikheid.“Ons respekteer Mark se oorspronklike besluit om te onttrek, asook sy reg om in die openbaar oor sy teleurstelling te praat. Wanneer die omstandighede rondom die saak egter in die openbaar bespreek word, het ons eweneens die reg om toe te sien dat die feite akkuraat weergegee word.“Hierdie besluit is nie ligtelik geneem nie, en ook nie sonder om Mark verskeie geleenthede te bied om die situasie reg te stel nie. Die uitkoms het gevolg op sy vrywillige onttrekking, daaropvolgende gesprekke oor herinstelling, die verbintenisse wat tydens die Zoom-vergadering bespreek is, en wat daarna gebeur het.“’n Saak soos hierdie behels meer as een perspektief. Ons moedig dus enigiemand wat ’n mening vorm aan om die volle omstandighede in ag te neem en die feite by alle betrokke partye te verifieer voordat aannames gemaak of gevolgtrekkings getrek word wat slegs op een weergawe gebaseer is.“Uit respek vir die betrokkenes het die keurkomitee hom doelbewus daarvan weerhou om die besonderhede van die saak in die openbaar te bespreek. Dié standpunt moet egter nie vertolk word as ’n gebrek aan feite, of as bevestiging van ’n eensydige weergawe nie.“Die saak word nou as afgehandel beskou.“Ons fokus bly waar dit hoort: om Span Namibië te ondersteun, die Afrika-motocross-gemeenskap in ons land te verwelkom, en ’n MXoAN 2026 te lewer waarop Namibië trots kan wees.“Ons wens elke renjaer wat by Gallina Motocross Park deelneem, ’n veilige en suksesvolle byeenkoms toe.”

Keurkomitee hou voet by stuk oor Sternagel-beslissing

Comments

Namibian Sun 2026-10-05

Please login to leave a comment

Keurkomitee hou voet by stuk oor Sternagel-beslissing

Comments

Namibian Sun 2026-10-05

Please login to leave a comment

Subscription Required to Access Content ×

Login

Subscription Required to Access Content