Burger se manne bly in WB-wedloop in November

Ná ‘n uitdagende en spanningsvolle ekstra week in Uganda se hoofstad Kampala het die Namibiese rugbyspan sy veldtog lewendig gehou om vir die 2027 Wêreldbeker in Australië te kwalifiseer.Die flank Prince !Gaoseb en sy manne het ondanks ‘n moedige poging van die Verenigde Arabiese Emirate te veel motivering en ondervinding gehad en het ‘n wegholoorwinning met 86-29 opgestapel in die uitspeelwedstryd tussen die naaswenners van die Afrika- en Asië-streke.Die uitslag bespreek Namibië se plek in die finale uitspeeltoernooi vir ‘n enkele WB-kwalifisering in November vanjaar in Dubai teen België, asook na verwagting Brasilië en Kanada.Afrigter Jacques Burger het agterna gesê Namibië kon vir seker die wedstryd beter bestuur het as in die eerste 40 minute, toe die Emirate toegelaat is om telkens weer met punte te antwoord.“As ons ‘n bietjie meer volwasse kan wees in ons speelstyl, sal ons ‘n moeilike span wees om onder te kry.“Afrika-rugby is gesond ... Zimbabwe het verdien om vir die Wêreldbeker te kwalifiseer en ons het ook nog ‘n kans (om die vasteland se derde kwalifiseerder te word). Ons het vandag die oorwinning verdien en aanvaar die verantwoordelikheid teenoor die res van Afrika.“Ons het beslis nog baie om aan te werk (voor November), maar ons sal teruggaan tekenbord toe en seker maak ons is volgende keer beter.”Burger sê die pyn van die vorige naweek se nederlaag met 28-30 teen Zimbabwe het die span aangevuur.“Elke speler vir wie ons opgeroep het (as plaasvervangers vir beseerdes of beroepspelers wat na hul klubs en unies moes terugkeer), was gretig om betrokke te wees. Met die kort tyd tot ons beskikking het hulle hul hand opgesteek. Daar was steeds baie foute op die aanval en verdediging; ons verloor konsentrasie en verslap nadat ons punte aangeteken het, maar ons sal daaraan werk.“Ons het die tweede kans gekry wat ons gesoek het; nou moet ons vir mense die karakter in hierdie span wys. Ek belowe jou ons sal veg om daardie laaste beskikbare WB-plek te verdien.”Ervaring gee deurslagOndanks die invloed van uitgeweke Suid-Afrikaners, Europeërs en Fidjiane in die Emirate se span wat vanjaar besondere opgang gemaak het, het Namibië se groter ervaring op topvlak na vore gekom.Die Emirate se agtsteman Emosi Vecenaua het ná twee minute van die kwartlyn af deurgehardloop vir die eerste drie nadat hy agter ‘n losskrum opgetel het, maar die Namibiese voorspelers het tot die aanval oorgegaan en heelagter Cliven Loubser het met ‘n oorslaanaangee ‘n drie vir die jong vleuel Jurgen Meyer geskep.Die intensiteit van die agttal se dryfspel en beskerming van hul fasebesit het bygedra tot die drieë van agtsteman Richard Hardwick en twee opeenvolgens vir haker Torsten van Jaarsveld, wat die telling tot 22-10 ná 17 minute opgestoot het.Hoewel die Emirate met ‘n ondernemende stukkie spel die binnesenter Jack Stapley vir ‘n drie oorgewerk het om weer binne trefafstand te kom, het Namibië weer die druk toegepas en toe die flank en kaptein Prince !Gaoseb net kort van die doellyn gekeer is, was Hardwick daar om die vyf punte op die telbord te plaas.‘n Lynskop van André van der Berg is ná 27 minute afgestorm wat vir die losskakel se direkte opponent Max Johnson ‘n drie gebring het (29-22), maar Namibië het weer ingeklim totdat die slot Oliver Kurz hul volgende drie afgerond het. Van der Berg het ook met sy doelskoppe sy korrel begin inkry.‘n Geel kaart vir die VAE se blonde slot Matthew Mills ná ‘n waarskuwing aan die span was ‘n keerpunt. Van der Berg se strafdoel het die rustydfluitjie op 39-22 laat blaas, maar Namibië sou nog twee verdoelde drieë druk voor Mills sy terugkeer sou maak.Die afrigterspan het plaasvervangers soos Adriaan Booysen en die debutant Aston Mukwiilongo reeds ná rustyd oopgestuur, met die laasgenoemde FNB Kudus-heelagter wat met sy eerste aanraking van die bal ‘n drie gedruk het toe hy ná ‘n Booysen-stormloop die bal op die voorvoet optvang en homself van twee verdedigers weggestamp het (46-22).Senter Alcino Izaacs het regtervleuel Danie van der Merwe vir sy eerste toetsdrie weggestuur, terwyl reserweslot Adriaan Ludick vir die volgende drie oorgebars het om die 60-tal op die telbord te plaas.Die Emirate kon nie ‘n hoë skop deur Van der Berg hanteer nie en Danco Burger het besit teruggewen en vinnig versprei, vir sy sentermaat Izaacs om met ‘n slim rolskop die bal in die pad van die onbewaakte Mukwiilongo vir sy tweede drie te stuur.Nog ‘n geel kaart vir die Emirate ná 70 minute het nog ‘n spyker in hul doodkis gekap, met Namibië wat drieë deur die reserwehaker Armand Combrinck (twee) en flank Max Katjijeko bygevoeg het om hul totaal verby tagtig te stoot.Ondanks ‘n onseker begin met die skopvoet het André van der Berg uiteindelik met nege doelskoppe en ‘n strafdoel 21 punte versamel.

Burger se manne bly in WB-wedloop in November

Comments

Namibian Sun 2025-09-18

Please login to leave a comment

Burger se manne bly in WB-wedloop in November

Comments

Namibian Sun 2025-09-18

Please login to leave a comment

Login