AGA Namibië se goue seun en meisie koester Olimpiese droom

Burton Weakley en Teresa Kasomba, twee knap 17-jarige boogskutters wat die titels “goue seun” en “goue meisie” dra nadat hulle African Genesis Archery (AGA) Namibië se nasionale titels gewen het, het elk hul visier daarop gerig om vir die Olimpiese Spele te kwalifiseer.Beide het vanjaar die plaaslike kompetisies oorheers – Weakley met 24 goue medaljes en Kasomba met 19 goue medaljes – in die opbou tot AGA Namibië se finale ranglys-skietbyeenkoms van die jaar by Windhoek Internasionale Skool op 26 Oktober.Breek 7-jaaroue rekordWeakley (Windhoek Hoërskool), AGA Namibië se topgekeurde senior manlike boogskutter en 'n driemalige nasionale kampioen, het in Julie opslae gemaak toe hy die lankstaande 3D-rondterekord van 294 punte by Moria Privaatskool met 'n merkwaardige telling van 295/300 verbeter het.Die vorige rekord het vir sewe jaar gestaan vandat Willem Lottering dit by Berg-Op Akademie op Okahandja opgestel het.Weakley het oor sy sukses gesê: “Om die vorige drie-en-'n-half jaar as kampioen gekroon te word, voel ongelooflik. Ek hou daarvan om teen goeie boogskutters mee te ding; wanneer jy dan bo uitkom, maak dit dit net soveel beter!”Weakley se vordering in boogskiet het in 2018 begin, danksy sy pa se aanmoediging. Hy erken dat hy die sport aanvanklik 'n bietjie vervelig gevind het. Met die verloop van tyd en met die besef van die selfvertroue en dissipline wat gekweek word deur geestelike en fisiese uitdagings te oorkom, het hy stelselmatig verlief geraak op die sport.“Ek plaas my vertroue op God tydens kompetisies; ek gaan in 'n oomblik van stilte en voel Sy teenwoordigheid oor my, wat my kalmeer en gereed maak om te skiet. Ek het so baie uit hierdie sport geleer en sal dit vir almal aanbeveel!”Weakley sê sy doelwitte strek verder as bloot om nasionale rekords te oortref, aangesien hy beplan om Namibië by die Olimpiese Spele te verteenwoordig. “Ek dink nog daaraan of ek boogskiet 'n loopbaan moet maak, maar vir nou geniet ek elke oomblik," het hy verseker.Afrigter se motiveringTeresa Kasomba (Community Hope School), AGA Namibia se topgekeurde senior vroueboogskutter en tweemalige nasionale kampioen, het haar boogskietreis in 2021 begin, geïnspireer deur haar liefde vir Robin Hood.Dit was egter eers in Maart 2022 dat sy werklik op die sport verlief geraak het.“My afrigter, Andile Jaarsak, het geweier dat ek tou opgooi. Hy het aangedring dat ek algaande baie goed kon word. “Toe ek hom sien skiet, was ek verstom oor hoe elke pyl die teiken tref. Dis toe dat ek besef het toewyding hou die sleutel en ek het hard aanhou werk om sy vlak te bereik,” onthou sy.Kasomba het vanjaar 19 goue medaljes gewen en sê sy voel baie gelukkig en trots. “Daar is soveel uitstekende boogskutters teen wie ek moet meeding. Baie keer het ek gevoel ek kan dit nie doen nie, maar ek dank die Here wat saam met my was by elke kompetisie,” het sy gesê.Harde werk en passieHaar vasberadenheid om op te staan ná teleurstellings – soos een van haar kompetisies by Pro-Ed in Mei, waar sy net twee silwermedaljes en 'n brons verower het – dryf haar nou om harder te werk.Beide Weakley en Kasomba sê om skoolwerk en boogskiet te balanseer, kan uitdagend wees. Kasomba woon van Maandae tot Donderdae van 14:00 tot 16:00 klasse by, gevolg deur 'n uur se oefening.Weakley benadruk ook die belangrikheid van goeie tydsbestuur. Buiten vir boogskiet is hy passievol oor jag en ander sportsoorte om met vriende te deel, terwyl Kasomba lief is vir skaak en skets.Albei boogskutters droom daarvan om eendag by die Olimpiese Spele deel te neem, met Kasomba wat ook daarna streef om 'n afrigter te word en 'n loopbaan in argitektuur te volg.Wat rolmodelle betref, kyk Kasomba op na die Britse boogskutter Ella Gibson, terwyl Weakly motivering by sy mededingers vind. Mededinging in sy eie land en in Afrika, en om die respek van sy mede-boogskutters te verdien, is sy motivering om meer goud te wen.– mariud@nsh.com.na

AGA Namibië se goue seun en meisie koester Olimpiese droom

Comments

Namibian Sun 2025-06-25

Please login to leave a comment

AGA Namibië se goue seun en meisie koester Olimpiese droom

Comments

Namibian Sun 2025-06-25

Please login to leave a comment

Login