Wakudumo: Nujoma okwe tu hupitha muudhigu woolebele dhaUnita

Ngoloneya gwoshitopolwa shaKavango Uuzilo Bonifatius Wakudumo ota ti omukokoli presidente gwaNamibia Sam Nujoma okwa kutha etokolo lyomeendelelo opo oolebele dhaUnita ndhoka dha li tadhi piyaganeke oshilongo moomvula dho1990 nasha, opo dhi shunithwe kaandjawo.Moonkundathana noshifo shoNamibian Sun mEtitatu, Wakudumo okwa simaneke nakusa omupresidente sho paumwene i idhopo mo sho oolebele dhaAngola dha li dha ningi oshitopolwa shaKavango ongehala lyomalugodhi, pethimbo dha li hadhi yi momikunda nomikunda nokuyaka po iimuna yaantu nokumbandameka oshigwana shili.Mo1998 nomi1999, aasindumbo nepangelo yetanga lyaUnita oya li eshongo enene kaamwameme. Oya li haya iyakele moNamibia uusiku nokuyaka po oongombe niikombo yaantu, nokutilitha aantu, oshoka oolebele odha li dha geya shaashi anuwa presidente Nujoma okwa zimine opo aakwiita ya li taya kondjele emanguluko lyaAngola yoFAPLA [People&#039;s Armed Forces of Liberation of Angola] naakwiita yomAngola a manguluka ya dhike oontanda dhawo moNamibia,” Wakudumo a ti.Mokudhimbulula kutya onkalo otayi nayipala, Nujoma inaga gandja owala omalombwelo e li kOvenduka ashike okwe yi e ki italele ko ye mwene omathimbo nomathimbo.“Sho aaleli yomoshitopolwa ye mu indile opo e ya kwathe, okwa li e ya ye mwene ina tuma ko. Ina kwatakwata. Okwa ti kutya Unita ota tidhwa mo nokulongwa mo, nesiku olyo tuu ndyoka otwa mono ongundu onene yaakwiita Aanamibia ya zi mokamba yaOmega okuya koongamba koKatwitwi,” Ngoloneya a hokolola.“Omulonga ogwa kala tagu patololwa kaakwiita naUnita okwa tidhilwa kokule meni lyaAngola, nombili nengungumano twa mono ishewe. Okwa li omuleli omuwanawa – omunamatokolo, ependa nokuhole egameno lyaalelwa ye olyo tali ya ponomola yotango.”IiponokelaMu Januali mo2000, onzokundana yoPanafrican News Agency (Pana) oya kundaneke kutya aatalelipo Aafulansa aanona yatatu oya dhipagwa naavali yawo oya ehamekwa noonkondo moshilangela taku fekelwa sha longekidhwa koolebele dhaUnita mOshitopolwa shaCaprivi, shoka monena twa tseya ongaZambezi. Oshiponokela shika osha mbandameke aantu oyendji omolwa omakulunguto ogendji kOnooli.Uunona mboka wa dhipagwa – owa li wu na oomvula 10, 15 no18 – nowa yahelwa mondjila onene yaTrans-Caprivi poBagani molweendo okuya kOvenduka okuza mokutalela po mpaka naampeyaka.Oshitopolwa shaCaprivi noshaKavango oya li ya kwatwa ko koolebele dhaUnita, ndhoka dha geyela Omupresitende oshoka okwa pitika, opo omatangakwiita gaAngola ga yunge oontanda dhago nokukondjithila oolebele moNamibia.Mu Apilili mo2000, onzokundana yoPana oya kundaneke kutya Nujoma okwa dhenge omuthindo natango keitulomo lyaNamibia okukonga mo oolebele dhaUnita moAngola ngele odha tsikile nokupiyaganeka ombili nengungumano moKavango nomUuninginino woshitopolwa shaCaprivi.“Itapu ka thigwa emanya lya londa kekwawo mokuungaunga noolebele dhaUnita ndhoka ngaashingeyi tadhi piyaganeke ombili nengungumano kiitopolwa mbyoka iyali,” Nujoma okwa lombwele oparliamente konima yoshipopiwa she shokupopitha oshigwana omumvo ngoka.Onkalo yomakulunguto oya nayipala moshitopolwa shaKavango kombinga yokuuzilo noshowo koshitopolwa shomuuninginino waCaprivi naakwashigwana oya li ya thiminikwa ya kale haya lala miihwa, oshoka oya li ya tila kutya otaya ponokelelwa momagumbo gawo koolebele dhaUnita pethimbo lyuusiku.Omalweendo gaakwashigwana pokati kaRundu naKatima Mulilo oga ningwa mewiliko lyaakwiita omolwa iiponekela oyindji mboka mwa sila aantu oyendji, mwa kwatelwa iiponokela yaatalelipo aakwiilongo taya ende mondjila onene yaTrans-Caprivi Highway.Momasiku 22 gaDesemba 1999, oolebele dhaUnita odha ponokele Okamba yaapolisi yopalapala (ndjoka ihayi dhana) poMbambi, yi li omukakena gwookilometa 200 muuzilo waRundu. Oolebele odha dhipaga omupolisi gumwe nokweehameka aapolisi yatatu. Aasindumbo nepangelo oya li wo ye ehameke okamatyona kamwe pethimbo lyokuyaka megumbo lyomukwashigwana manga inadhi shuna moAngola.nikanor@nmh-hub.com.na

Wakudumo: Nujoma okwe tu hupitha muudhigu woolebele dhaUnita

Comments

Namibian Sun 2025-05-02

Please login to leave a comment

Wakudumo: Nujoma okwe tu hupitha muudhigu woolebele dhaUnita

Comments

Namibian Sun 2025-05-02

Please login to leave a comment

Login