Aayelele omayuvi omulongo ya mono uuthemba woshilongo

Aayelele ya konda 10 900 oya pewa uuthemba woshilongo okupitila mopolohalama yepangelo ndjoka ye ya nuninwa. Ndjika onkatu ombwanawa ya katukwa okukwatela mo kehe gumwe nokuthikitha omayakulo gepangelo kuyamwe yomaantu ya dhinika moshilongo shetu. Shi ikolela kuuministeli wiikwameni, Aayelele 10 932 oya pewa uuthemba woshilongo okua esiku oshikonga shika sha tameka sigo omesiku eti-24. Oshikonga shika osha tamekele momasiku 23 Juni notashi ka hula momasiku 30 Auguste. Oshinyangadhalwa shika, otashi kwatelwa komeho kuuministeli wiikwameni melongelokumwe noshikondo shaadhinwa mOmbelewa yOmupresidente noshowo kuuministeli wuukashikekookantu, otashi lalakanene oku pa Aayelele 16 000 uuthemba woshilongo mboka ye li miikandjohogololo 63. Oshikonga shika shAayelele ayehe moshilongo shetu otashi ningilwa miitopolwa mbyoka yi na Aayelele oyendji yaa na omikanda dhoshilongo noyo nee Oshikoto, Omusati, Oshana, Otjozondjupa, Hardap, Omaheke, Ohangwena, Kavango Uuninginino, Kavango Uuzilo naKunene. “Oshikonga shika otashi kambadhala okukwashilipaleka kutya kape na ngoka ta thigala po. Uuthemba woshilongo kaushi uuwanawa wu tau kala koohashikeshalye; ashike owo uuthemba womuntu kehe," Etienne Maritz omukuluntupitithi muuministeli wiikwameni a ti. "Mokweeta omayakulo popepi noshigwana, unene tuu kaakalimo yokiitopolwa yokomikandi, oshigwana otashi simanekwa nokugalulila uuntu washo nokupala ondjila ya manguluka okumona omayakulo ge nasha neilongo, nuunamiti nomayakulo galwe ga simana," okwa gwedha po. Uuthemba woshilongo negameno Omayakulo ngoka ta gandjwa moshikonga shika ongaashi egandjo lyoonzapo dhomavalo nokuthanekwa uumutse woshilongo, noshowo okuninga omaindilo okupewa natango onzapo yehokano nenge onzapo yeso konima yoku yi kanitha nenge ya yonuka noshotuu. Omuyakulwa ota mono woo ompito yokupukululitha uuyelele we mboka wa puka puuthemba we. Oshikwawo, uumutse woshilongo mboka inau ka talwa kooyene koombelewa nawo otau ka gandjwa kooyene. Omakwatho goshali otaga gandjwa pethimbo olyo tuu ndjoka kaanambelewa yoshikondo shaadhinwa noshowo yuuministeli wuukashikekookantu. Oshigwana shAayelele oshindji oshi li kiitopolwa yokuushayi nokiitopolwa yasho kaku na naanaa oombelewa dhepangelo dhi li popepi, onkene ohashi kala oshidhigu okugwanitha po omikanda ndhoka taya pulwa ishewe olefa otayi pula mondjato uuna taya kongo uuthemba woshilongo. Iikonga yegandjo lyomauyelele oya simana Okutala kelaka ndjoka li li eshongo enene mokulonga noshigwana shika shAayelele, uuministeli wiikwameni otau indile oshigwana opo shi kwathathanene mokukwashipaleka kutya etumwalaka otali yi okawi nokawi, oshoka uuministeli owa ndhindhilika kutya okulombwelathana omauyelele oko haku thikitha etumwalaka kukehe gumwe nokwaamboka ye li kiitopolwa yokokulekule. Ooyene yomikunda nomalenga, ookamunsela yiikandjohogololo, omahangano kaa ge shi gontanitho noongundu dhilwe momidhongoloko nomidhingoloko otadhi indilwa opo dhi lombwele aantu mpoka omayakulo taga monika noshowo ya lombwele oohandimwe kutya oodokumende dhini tadhi faalelwa uuna taya ka konga uuthemba woshilongo. Moompito moka pe na yamwe kaa ye na omikanda ndhoka tadhi pulwa, otaya ka yakulwa koogumwe noogumwe.

Aayelele omayuvi omulongo ya mono uuthemba woshilongo

Comments

Namibian Sun 2025-09-17

Please login to leave a comment

Aayelele omayuvi omulongo ya mono uuthemba woshilongo

Comments

Namibian Sun 2025-09-17

Please login to leave a comment

Login