Meatco: N$13,2 m. se verlies in NCA

Teen Januarie is slegs 3 048 beeste by die Katima Mulilo-abattoir op ’n jaar tot datum basis geslag. Die lae verslagtingsyfer is glo daaraan toe te skryf dat net een kwarantynkamp van die abattoir operasioneel is. Meatco verduidelik in sy jaarverslag wat verlede week uitgereik is dat slegs diere wat onder kwarantyn geplaas is, geslag kan word. Terselfdertyd het die Katima Mulilo-fasiliteit glo ernstige herstelwerk nodig om seker te kan maak dit kan funksioneer. Die tydperk onder oorsig is vanaf 1 Februarie 2022 tot 31 Januarie 2023. Volgens die verslag het Meatco beoog om 9 167 beeste by die abattoir te slag, wat beteken dit het ’n tekort aan deurset van sowat 5 353 beeste gehad. “Meatco het in die noordelike kommunale gebied (NCA) ’n opbrengs van sowat N$60,5 miljoen getoon, teenoor ’n begrote opbrengs van N$99,6 miljoen,” lui die verslag.“Teen Desember 2022 het Meatco se verlies in die noordelike kommunale gebied op sowat N$13,2 miljoen gestaan, teenoor ’n verlies van N$1,15 miljoen waarvoor begroot is. In Januarie 2023 is ’n verlies van N$1,2 miljoen aangeteken – hoofsaaklik weens die lae getal beeste wat geslag en verkoop is,” word verduidelik. NET SES MAANDEDirekteure verduidelik egter dat die abattoir slegs in Junie verlede jaar met verslagting begin het en daarin geslaag het om sy opbrengs van N$2 miljoen in die 2022-boekjaar na N$40 miljoen in die 2023-boekjaar te verminder, terwyl verliese met 68% gekrimp het. “Herstelwerk word by die kwarantynfasiliteit gedoen, wat eindelik sal help dat die verkryging van diere by Katima Mulilo ongehinderd kan plaasvind. Dit behoort die abattoir in ’n winsgewende fasiliteit te omskep.Daarbenewens behoort die Rundu-abattoir teen die einde van Junie aan Meatco oorhandig te word. Dit behoort toegang tot sowat 500 kleinboere te hê.HOOPMeatco sê egter hul bedrywighede by die abattoir verbeter voortdurend en dat hulle na verwagting sekere doelwitte sal bereik, wat die fondasie sal lê vir verbeterde opbrengste in die komende boekjaar. Vee wat op Katima Mulilo geslag word, word in markte suid van die veterinêre kordonheining (VCF), Angola, Ghana en in die Demokratiese Republiek die Kongo (DRK), bemark. Meatco sê verkope het in die laaste kwartaal van die boekjaar toegeneem. “Markte suid van die VCF het 44% van die produkte gekoop, NCA-markte 34% en 22% is aan uitvoermarkte gelewer,” het Meatco in sy jaarverslag gesê. Hiervolgens het Angola Meatco sowat N$50 per kg vir die vleis betaal, Ghana het N$79 per kg betaal, die DRK N$103 per kg en groothandelaars N$63 per kg. Plaaslike aankopers binne die NCA het ook N$50 per kg betaal.Primêre, ontbeende snitte is suid van die VCF bemark. Sowat 88,8% van die beeste wat by die abattoir bemark is, was C-grade, 10,2% was B-grade en net sowat 1% was A- of B-grade. Daarbenewens het die gemiddelde karkas 208 kg geweeg met ’n uitslagpersentasie van 52%.“Verskeie kleinhandelaars asook toerisme-ondernemings in die NCA koop egter hul vleisprodukte van slaghuise suid van die VCF. Bestaande kontrakte met verskaffers suid van die VCF asook kwessies oor gehalte word dikwels as ’n rede voorgehou. Dog is die gehalte van produkte wat by Katima Mulilo of by die Meatco-slageenheid geproduseer word, vergelykbaar met produkte suid van die VCF,” sê Meatco.SUKSESMeatco sê sy sukses in die NCA’s is afhanklik van operasionele doeltreffendheid en pogings om opbrengste uit sy markte te maksimaliseer. “Die NCA-mark bly winsgewend vir die meeste bestuurders van abattoirs suid van die VCF. “Vir baie jare kon NCA-boere nie toegang tot nismarkte kry nie. Die geleenthede is nou beskikbaar danksy Meatco se robuuste strategie vir markontwikkeling,” het Meatco se uitvoerende hoof, Mwilima Mushokabanji, in ’n mediaverklaring gesê. Meatco kon markte vir die vleisprodukte open danksy die toepassing van ’n kommoditeitsgebaseerde handelsprotokol. “Ons is tans besig met finale onderhandelings om markte vir NCA-vleis in die Midde-Ooste te betree.“Meatco het die mylpale bereik deur ’n inklusiewe agenda te dryf om alle produsente te bedien, ongeag waar in Namibië hulle woon,” het hy gesê en bygevoeg dat Meatco bereid is om die Rundu- en Oshakati-abattoirs te dryf om marktoegang vir NCA-boere te bewerkstellig. – elvira@republikein.com.na

Meatco: N$13,2 m. se verlies in NCA

Comments

Namibian Sun 2025-05-02

Please login to leave a comment

Meatco: N$13,2 m. se verlies in NCA

Comments

Namibian Sun 2025-05-02

Please login to leave a comment

Login