Oshikonga ‘Operation Lucia’ tashi kondjitha iimbuluma mOshana

Minista yIikwameni, Omatembu, Egameno nEpopilo, Lucia Iipumbu, okwa tamekitha pambelewa oshikonga shedhina Operation Lucia sha ningilwa pOombonge oonene dhOpolisi mOshakati mehuliloshiwike twa zi, naashika osho onkatu ombwanawa ya katukwa kepangelo mokugwedha ko kiilonga yawo yokukondjitha iimbuluma moshitopolwa shaShana.Oshikonga shoka, osho shotango sholudhi ndoka, otashi lalakanene okushonopeka iimbuluma ngaashi omunyeka kwa homata, omadhipago, omahepakethano gopaukashikekookantu, iiponga yomoondjila, okukwatwa niingangamithi nokuhanagula po omaliko gaantu, iimbuluma mbyoka tayi londo pombanda. Iipumbu okwa dhenge omuthindo kutya okukaleka po oveta nelandulathano osho ohinima sha simana lela shoka tashi vulu owala okutsakanithwa ngele pe na iikonga ya kwata miiti yokukeelela iimbuluma.“Otwa haluthwa unene kiimbuluma yi nyanyaleka niimbuluma yilwe mbyoka tayi londo noonkondo moshitopolwa. Nonande ongawo, otashi etitha oonkondo okukoneka iilonga yopolisi yokumonena po nokukeelela iimbuluma manga inayi longwa,” Iipumbu a ti.Okwa pandula opolisi molwiilonga yawo iiwanawa yomonanguwi, okwi indile opolisi yi kwathelwe opo yi tsikile niilonga yawo iiwanawa, mwa kwatelwa nokulongitha uutekinolohi. Iipumbu okwa londodha woo aapolosi ya yande okulongitha nayi oonkondo, ta ti okuthiminika nenge okudhenga aakwashigwana naku ningwe uuna sha pumbiwa nomoongamba dhoveta nelandulathano.“Okukala omupolisi naku kale kwa kalela po egameno, ihe hambandameko. Aapolisi inaya kala nande aakolokoshi,” okwa dhenge omuthindo.Mokutamekitha oshikonga shika, Iipumbu okwa patrola oshitopolwa opo i imonene ko nkene onkalo yi li moshitopolwa. Okwa talele po okapale komaudhano kOshakati Independence Stadium, pethimbo kwa li kwi ipyakidhilwa nomaudhano goTop Score Oshiwana 7-a-side, okwe shi ningi nelalakano opo a tale omaihumbato gaakwashigwana ngele ye li momangundumano. Iipumbu okwa yi woo muundingosho wumwe nomooklaba dhimwe opo a tale ngele otadhi iyutha tuu kooveta dhi nasha negameno nokutala woo ngele oshigwana otashi longitha iingangamithi inayi pitikwa.Okwi indile oshigwana shi longele kumwe nopolisi mokulopota aalongi yomiyonena kopolisi nomukuyambidhidha woo iikonga yopolisi mbyoka tayi kaleke po egameno moshigwana.Major general Elias Mutota, Omupevi Inspekta General gopolisi yaNamibia, okwa popi woo poshiithanene shika, nokwa ti oshikonga shedhina Operation Lucia osha simana mokukeelela iimbuluma notashi lalakanene okuhanagula po omahala ngoka haga holama oombudhi nogu udha ookalyamupombo mOshana nomiitopolwa yopuushiinda. Mutota okwa dhenge omuthindo kutya oshikonga shika otashi ka tala kokugongela uuyelele monanguwi, kokupatrola lela apehepehe, okutala po omainda gomoondjila, okukwata ko iinima inayi pitikwa moshilongo, okuya moonkundathana noshigwana nokugandja omauyelele noshowo okukonga nokukwata po aafekelwa mbalambala.“Egameno nepopilo lyoshigwana shetu olyo li monomola yotango kutse Etanga lyOpolisi yaNamibia. Oshikonga shika osho uumbangihokololo kutya otwi itula mo mokukutha mo nokuvudha mo ookalyamupombo moshigwana nokugalulila einekelo maantu ya kale ye na omukumo kutya opolisi otayi ya gamene noku ya popila,” okwa ti.

Oshikonga ‘Operation Lucia’ tashi kondjitha iimbuluma mOshana

Comments

Namibian Sun 2025-10-15

Please login to leave a comment

Oshikonga ‘Operation Lucia’ tashi kondjitha iimbuluma mOshana

Comments

Namibian Sun 2025-10-15

Please login to leave a comment

Login