Opolisi mOshana yapewa iilongitho yoku ufena

Ombaanga yaNamibia mOmaandaha oya gandja omagano gomashina yomogyma gongushu ya konda po N$300 000 kaapolisi yomOshana.

Monale, aapolisi mOshana oya kala nokwiidheulila pondje momaudheulo haga ningwa lumwe momwedhi mEtitatu, Komanda gwopolisi moshitopolwa Komufala Naftal Lungameni Sakaria a ti.

Sakaria okwa ti omadheulo gawo ngaashingeyi otaga ka kala haga ningilwa meni ndele hapondje we.

Okwa pandula Ombaanga yaNamibia molwa omagano ngaka, ta ti kage shi owala omashina gaapolisi – ihe olyo eitulemo muukalinawa wawo nomonakuyiwa.

“Esimano lyuukolele waapolisi itali manwa okupopiwa. Uukolele wokolutu ohawu kwatha aapolisi yi idhidhimikile oonkalo dha yooloka nokuyanda nokushonopeka iiponga nokweehama. Uukolele ohawu kwatha aapolisi ya kwatele po uundjolowele wawo wopamadhiladhilo, opo ya longe iilonga yawo nawa,” Sakaria a ti.

Okwa fatulula kutya iilonga yuupolisi oyi na okupatola okundjikundji, hoka haku lolodha aapolisi kolutu nomomadhiladhilo. Ogyma, okwa ti , ngashingeyi otayi ka pa aapolisi ehala lyokupangela nokumona oonkondo oompe.

Okwa dhenge omuthindo kutya aapolisi ya ndjanga ohaya kwatha opo oshigwana ashihe shi kale megameno notashi longo nawa. Sakaria okwa kwashilipaleke kutya omagano ngaka otaga ka kwatwa nawa nokulongithwa ngaashi ga uthwa, muuwanawa waapolisi nowoshigwana.

Esipa lyombunda lyegameno lyoshigwana

Omukuluntuwiliki gwiikwambanga mOmbaanga yaNamibia, Sencia Kaizemi-Rukata, okwa ti opolisi ohayi dhana onkandangala onene mokukaleka po oveta nelandulathano, nokutya oyo esipa lyombunda lyoshigwana.

Kaizemi-Rukata okwa ti iilonga iidhigu yuupolisi oya pumbwa eidhimimiko noonkondo dhopalutu.

“Onkene, otu wete omashina gomogyma twa gandja otaga kala onzo ya simana yokukaleka po uukolele weni nuukalinawa,” okwa ti.

Okwa ndhindhilike kutya, molwa eyambidhidho ombaanga yaNamibia hali kwathwa nalyo kaapolisi, osho osho opala okwiitula muukolele nuukalinawa wawo mokusimaneka uudhiginini wawo.