Ookwatwa oshowo omunambelewa yeehamekelwa miikolokosha yomondjeedhililo

Pethimbo lyokashaya hoka ka ningwa, opolisi oya kwata oongodhi dhopeke dhili 18, uupakete wiingangamithi wuli 15 oshowo ombele.Shoka osha kolekwa kukomanda gwopolisi omupe gwoshitopolwa shaShana, Naftal Lungameni Sakaria.Uuna ookwatwa dhoka tadhi yakelemo iinima mbyoka yiindikwa mondjeedhililo ohadhi tindi okuhadhwa kopolisi.Etanga lyopolisi lyashewa olya li lyiithana opo li yambidhidhe opolisi sho ookwatwa dha tameke okupolokela aapolisi pethimbo lyokashaya.“Otu na omunambelewa gwopolisi ngoka eehamekwa noonkondo na okwa falwa meendelelo koshipangelo. Ehala olya li lya kwatwako kookwatwa nomukalo ngoka gwali po opo opolisi yiigamene okuza kaanadholongo mboka okulongitha owala ooholo dhoongumi. Ookwatwa odha hala okuninga ondjeedhililo onga ehala ihali endwa kaapolisi ihe shoka itashi pitikwa,” Sakaria ngoka a tameke iilonga ye onga komanda gwopolisi moshitopolwa shaShana, oshiwike sha piti, a popi.Konima yiikolokosha mbyoka ya ningwa oshiwike sha piti, okashaya hoka oka kaalekwa na oka ningwa owala mOmaandaha. Komanda okwa yi pamwe nomukuluntu gwosasiyona yopolisi nokukunkililwa ookwatwa kutya oshitopolwa shaShana itashi ningwa ehala lyondiikwatela okuza kaanadholongo.Mokati kookwatwa dhoka dha ehamekwa omwa kwatelwa Edward Haihambo (34), ngoka ta tamanekelwa edhipago lyomukadhona gwe Lucillia Bunita Quimbra (30), miipathi yaanona ye yane momvula yo 2019.Haihambo okwa hokolola kutya: “Opolisi lwopotundi onti 09:00 oye ye tu lombwele kombinga yokashaya ihe otwa nongele kutya oye ya netanga lya shewa. Konima yethimbo oya adha oshinima shimwe nondunda onti 10 ihe inaye tu lombwele kutya oshike na oya yi moontamanana naantu yomondunda ndjoka.”Pethimbo lyiikolokosha etanga lyegameno lya shewa olya tameke tali umbu nonkalo oya piyagana.“Onda li nda tondoka opo ndi ka holame ihe onda yahwa mokwaako. Otwa ehamekwa tu li omugoyi nopolisi oya tokola okutufala koshipangelo.”Okwa lalekwa mo moshipangelo konima yomasiku omashona na okwa shuna kondjeedhililo ihe okwa shunwa koshipangelo mOmaandaha.Ookwatwa dhilwe ndhoka dha holola inadhi hala okupopiwa komadhina odha popi kutya shoka kashi shi oshikando shotango opolisi tayi longitha oonkondo na ohaya ningilwa woo omatilitho noombistoli.Namibian Sun okwa talelepo Haihambo posasiyona yopolisi pethimbo lyoowili dhokutalelapo mEtitano, ihe opolisi oya pula omutoolinkundana ngoka a thigepo ehala konima sho ya dhidhilike tayi moonkundatha naHaihambo.Opolisi oya popi kutya ota pitikwa owala okuya moonkundatha niikundaneki miipathi yahahende gwe Pombili Shipila nenge kepitiko lyakomanda gwosasiyona Chief Inspector Allo Matheus.Oshipotha shaHaihambo osha li sha kuthwamo momasiku gatatu gaMaalitsa momvula 2021 opo epangelo li ninge omalongekidho gokufala oshipotha shoka kOmpangu yoPombanda.Namibian Sun okwa lopota kombinga yemangululo lye, na okwa li a maangwapo esiku olyo tuundyoka momasiku omugoyi gaJuni mo 2021.Okwa li a pumbwa a ye momapangu esiku lya landula ihe inashi ningwa naShipila okwa ningi eindilo mompangu opo omuyakulwa gwe a mangulule omanga a tegelela epangulo.Haihambo okwa holoka mOmpangu yoPombanda yaShakati oshiwike shike moka omupanguli Johanna Salionga a tseyithile ompangu kutya otiikuthamo moshipotha shoka omolwa omatompelo gopaumwene.Oshipotha osha undulilwa komasiku 14 gaKotomba. Epangelo olya kalelwapo kuVictoria Shigwedha.Ofamili yaHaihambo pamwe nahahende gwe oye wete kutya Haihambo okwa ningwa oshihakanwa shaanambelewa yopolisi mboka ihaya laandula ompango.Haihambo okwa popi kutya ina vula okutulila mo opolisi oshipotha omolwa emonitho lyiihuna na okwa li natango eehamekelwa miikolokosha yomondjeedhililo omvula ya piti.Hahende gwe okwa hololwa kutya ofamili ye oyi li momalimbililo omolwa omamonitho giihuna ta ningilwa kopolisi omolwa omatompelo kage shiwike, na oyi wete ta geelwa nonando ina monika ondjo.

Ookwatwa oshowo omunambelewa yeehamekelwa miikolokosha yomondjeedhililo

Comments

Namibian Sun 2025-07-01

Please login to leave a comment

Ookwatwa oshowo omunambelewa yeehamekelwa miikolokosha yomondjeedhililo

Comments

Namibian Sun 2025-07-01

Please login to leave a comment

Login