Omupanguli Claudia Claasen mompangu yopombanda mOvenduka Omaandaha okwa gandja egeelo komukiintu Mecthilde Karomo (33) molwa iipotha iyali; konima sho a li a fikile aaiholathani yaali mombashu omanga ya li ya kotha.

Oonakuninga oshihakanwa oyo Leonard Haupindi Kadubuli naAnastasia Ihemba Matende mboka ya li a hulitha oondjenda muDesemba 2022 sho ya li ya pile mombashu yawo molukanda Okahandja Park mOvenduka.

Ashike Karomo oyo tuu nguka ina monika ondjo moshipotha sheyonagulo lyomaliko gaantu.

Etokolo ndyoka lya li lina omapandja omi-24 okwa li li ikwatelele kontompolwa onti-209 yoveta onti-51 yomomumvo 1977 ndjoka tayi ndjandukununa omilandu dhi na sha niilonga yuudhudhu nkene yi na okutaalela oveta. Oveta otayi gandja ompito epo etokolo li ningwe shi ikwatelela kwaashoka sha ziminwa komufekelwa nenge kuumbangi wu li po wa yela nowi iwetikile.

Ompangu oya li ya mono kutya shoka sha popiwa kuKaromo otashi tsu kumwe naashoka sha gandjwa kooihointaali mboka wa kankamekelwa unene kiinenenima ngaashi oonkambadhala Karomo a li a ninga tango osho wo omatilitho kutya ota fike po ombashu.

Ooihointaali oya ti Karomo okwa li a ti ohondamati ye ndjoka a topoka nayo ita pitika yi lale mombashu nomukiintu gumwe nokwa li a ti ombashu ote yi fike po.

Ompangu oya koleke kutya omatilitho ngaka oga ka tulwa miilonga shili, nombashu oya li ya fikwa po Uusiku owo tuu mboka noonakuninga oshihakanwa oya pila mo.

Elalakano nonkalo yomadhiladhilo

Omupanguli Claasen okwa li a mono wo kutya Karomo okwa li a ningi omatokolo ngaka omolwa ongeyo nuukodhi, shoka she mu etele opo a fike po ombashu.

“Omuntu otashi vulika a li inaa dhiladhila okudhipaga”, ihe otashi vulika natango a monike ondjo molwa edhipago ngele okwa mona kutya shoka a ningi otashi vulu okweeta eso onkene edhipago ota li talikila melalakano lye. Okfika po ombashu Uusiku, eshishi lela kutya ohondamati ye pamwe nohandakadhona yawo ompe oye li meni nenge tashi vulika ye li meni, otashi gandja uumbangi wa yela kutya Karomo okwe shi ningi nelalakano opo shivulike mboka ye li meni yaa vule okuzamo, ya sile oshimpwiininika nenge ya pile mo sigo omeso.

Omupanguli okwa gwedha po wo ta ti: “ Molwa oshinima shika shokuninga oshinima ena elalakano kutya shoka ta ningi otashi eta oshiponga, osha yela woo momapopyo ge, mokuzimina kwe osho wo omaihumbato ge ngoka taga ulike uuhasha sho a fike po ombashu. Okwa yi kegumbo nokwa ka kala ta pulakene koongalo kongodhi ye. Ayihe mbika otayi ulike kutya okwa li a uva nawa kwaashoka a ningi.”

Ompangu oya li ya tindi omaipatano gaKaromo, kutya ompangu oyi na uumbangi wa gwana onkene ota kala mondjedhililo molwa edhipago osho wo okufikila aantu megumbo. Obooloha ye oya li ya kuthwa nokwa kala mokalimosho.

Oshipotha otashi ka galukila mompangu momasiku 27-28 Apiilili moka ta mu ka ningwa ompangu tayi tetekele esiku ndyoka ta ka pewa egeelo.

[email protected]