Eihokololo lyaPohamba lyohole yomeholamo: ‘Ongame’

Mondjokononankalamwenyo ye, Footprints of Hifikepunye Pohamba, ya hokololwa ku-Ellen Namhila, Pohamba okwa hokolola nkene omukondjelimanguluko pwamwe naye a li e mu kwathele okuya hanganitha pethimbo lyekondjelomanguluko, taya tameke eihokololo lyohole ndjoka ya hulile mondjokana yawo moAngola mo-1983. “Onda tsakanene lwotango nomukulukadhi gwandje, Penehupifo Hipangelwa-Shiluwa, ngoka a tseyika nawa onga Kambosho, mo-1975, moDar es Salaam, Tanzania,” a nyola.Pohamba okwa li omukalelipo gwopombanda gwa-Swapo muUuzilo waAfrika, omanga Penehupifo, ngoka a lukwa Penny, a li omupangi a dheulwa nokwa li a hokanwa komukondjelimanguluko omukwawo Malakia Shiluwa, ngoka ya li ye na naye omonamati, Waldheim.Penehupifo okwa ka mono ompito yeilongo lyafutilwa lyoskola koJamaica opo a kononene muupangi womaluvalo. Omailongo ge oga li ga kundukidhwa keso lyomusamane gwe ngoka a hulitha miita moAngola muJuuli, omumvo 1979. Mokwaavula okushuna opo e mu lile, okwa kala kondje yoshilongo sigo a ka shuna lwanima moAngola mo-1981.Pohamba okwa nyola kutya ehalo lye muPenehupifo olya tameke mekwatathano lyopambapila lyombaadhilila naClaudia Kamati, omuniilonga pamwe naye ngoka a li longela naye moDar es Salaam nokwa li tiilongo pamwe naPenehupifo moJamaica.Mokukala a hololela Kamati kutya okwa hala okuhokana ihe okwa li ta dhigupalelwa okumona ngoka a opala, Pohamba okwa taamba omadhiladhilo ngoka ga ka lundulula onkalamwenyo ye – kutya na tale po puPenehupifo, omuselekadhi gwaMalakia Shiluwa.“Sho nda lesha ombapila yaClaudia, onda tameke okudhiladhila Penehupifo, Kambosho ngoka nda tsakanene naye pomathimbo ga yooloka, kaape na omadhiladhilo gokukala mekwatathano naye lyopaihole,” a dhimbulukwa. Pohamba okwa nyolele Penehupifo, te mu lombwele kutya omuniilonga pamwe naye oku na ehalo muye ashike ina holola kutya oye e li omuholi gwe gwomeholamo. Penehupifo okwa pula kutya omolwashike edhina lyomulumentu ngoka tali holekwa, ihe Pohamba okwa li inaa ilongekidha natango okuholola omaiyuvo ge. Mokati ko-1982, Pohamba okwa thiki moLuanda nokwa uvu kutya Penehupifo otalongele moshipangelo sheilongo lyaaNamibia moKwanza-Sul.Okwa longekidha etalelepo okukonaona iilongitho nomayakulo gOshikondo shUundjolowele shaNamibia kaaholami yiita yaaNamibia, nonando okumona Penehupifo osha li wo oshitopolwa shimwe shomiilonga ye.Sho a popitha osheendo shoka sha holoka pokamba, okwa pula a ka falwe kegumbo lye, hoka a ka mona uulaadhi wokuholola edhina lyomuholi gwe gwomeholamo. “Omuntu ngoka nda tumbula mombapila yandje kungoye moJamaica ongame mwene. Ogame omuntu ngoka e na ehalo mungoye,” e mu lombwele. Penehupifo, a li a kumwa kehololo ndyoka, okwa pula: “Omolwashike ino vula wu shi tumbule montumwafo?”Nonando Pohamba okwa zimine kutya okwa kondjo nokuholola omaiyuvo ge momanyolo, eimono lyawo olye mweetele enyanyu netegameno lyomonakuyiwa yawo.“Onda shuna koLuanda ndi li omulumentu a nyanyukwa lela. Omutima gwandje ogwa li gwa udha enyanyu,” a nyola.Muuzilo waBerlin Ekwatathano lyopaihole lyawo olya koko mekwatathano lyopandjigilile, nolwanima Pohamba okwe ke mu pula a ninge omukulukadhi gwe.Ihe, omategameno ge gokuhokana Penehupifo oga li ga iyiwa moshipala sho a hogololwa opo a ye kosikola yopolotika moGerman Democratic Republic.Nonando a li a sithwa uunye, okwa li uuvite ko ehalo lyaPenehupifo lyokutsakanena natango nomonamati, Waldheim, ngoka a li a tumwa muUuzilo waGermany konima yeso lyahe.“Onda li nde mu tegelela neidhidhimiko opo a galuke,” a nyola.Etopoko lyawo olya li lya ngungumanithwa kashona muDesemba 1982 sho Pohamba a ka taambelwa mUuzilo wa-Berlin molweendo lwiilonga yoSwapo noya ka tsakanena natango naPenehupifo, shoka sha nkondopaleke eitulomo lye oku mu hokana po.Sho a shuna moLuanda muJuuni 1983, Penehupifo okwa li a tembukile molukalwa lwa kashona omanga ta tegelele okutumwapo ishewe kiilonga, shoka she ya pe ompito yo ku kala pamwe olwundji.Pohamba okwa hokolola ethimbo ndika onga ompito “yokutunga, okukokeka, okukonona nokusimaneka” ekwatathano lyawo lyopaihole.“Onda li nda ninja etokolo nale momadhiladhilo gandje. Onda li ndi uvite ndiilongekidha oku kala okukalamwenyo kwandje akuhe pamwe naye,” a nyola.Okwa li a hokololele aaniilonga pamwe naye Peter Nanyemba naHidipo Hamutenya kutya okwa mona ‘omukiintu gwondjodhi ye’, noya li ye mu tsu omukumo a hokane ponkalo yokugwila mu shoka sha ithanwa “kwata”, nenge omwigo gwoongula nongula.Oya li ya pangele okuhokana mo-18 Aguste 1983, esiku lyevalo lyaPohamba, ihe oya li ya eta ohango popepi nesiku limwe molwaashoka Hamutenya, ngoka a li ta ka kala oshinkumbi oshinene shomusamane, okwa li e na oshilonga shimwe shoSwapo.Ondjokana yokombandaOya hokanathana mo-17 Aguste 1983 pokamba yomalweendo ya-Swapo kondje yaLuanda, moka ya hogolola oshituthi oshishona pehala lyoshituthi oshinene shoka aaniilonga pamwe yamwe ya li taya tegelele kuPohamba, ngoka pethimbo ndyono a li amushanga gwIimaliwa gwa-Swapo.Aayenda yamwe oya li ya sa uunye sho ya thiki kegumbo lyaafuko, ya tegelela oshituthi shoondya, ihe oyiitsuko owala otee oyo ayike tayi nuwa ko.Oshituthi shono ka sha li naanaa shokunyanyudha aayenda, ihe osha li shokutameka onkalamwenyo nomukiintu ngoka e hole.“Inandi ya pupa molwaashoka shoka nda li nda hala ondi topole onkalamwenyo yandje nomuntu a simana; omuntu ndi mu hole nondi mu sile oshimpwiyu,” Pohamba a nyola.Ondjokana oya eta enyanyu, ihe iipumbiwa yomekondjelomanguluko oya tsikile okukondjitha onkalamwenyo yawo yokutunga ofamili.Penehupifo okwa tsikile iilonga yuupangi moKwanza-Sul omanga Pohamba a li ta longele moLuanda, niilonga yawo oye ya kaleke kokule.Naakwanezimo ya andjakana moAngola, Zambia, Germany nomoNamibia, nokuhanganitha kehe umwe momutala gumwe pethimbo limwe osha li omukundu omunene.Omonamati gwawo gwotango, Tulongeni Tutungeni Tuhafeni Tulyeni Tudanaukeni ya Hifikepunye Pohamba, okwa valwa momasiku 9 gaApilili 1984, evalo ndyoka Pohamba e li dhimbulukwa nohole onene.“Kambosho okwa pe ndje omagano omanene, omonamati, a valelwa mondjokana yetu,” a nyola.Omonakadhona gwawo, Kaupumote, okwa ka landula muMeyi 1988, sho ekondjelomanguluko yaNamibia lya li lya thika mehulilo lyalyo.

Eihokololo lyaPohamba lyohole yomeholamo: ‘Ongame’

Comments

Namibian Sun 2026-10-23

Please login to leave a comment

Eihokololo lyaPohamba lyohole yomeholamo: ‘Ongame’

Comments

Namibian Sun 2026-10-23

Please login to leave a comment

Subscription Required to Access Content ×

Subscription Required to Access Content