Oshakati sha tula miilonga oshikonga shokukeelela endambi

Elelo lyondoolopa yaShakati melongelokumwe noshikondo shuuhaku wiinamwenyo mOndangwa, oya tula miilonga oshikonga shentuntilo okukeelela endambi, moka taya tuntile oombwa nuumbishi mOshakati tashi ningwa momwedhi nguka Mei 2026.

Omupopiliko gwelelo lyondoola yaShakati Martin Kapuka okwa ti oshikonga shika shoka sha tamekele Omaandaha, oshili shimwe shomiilalakanenwa yaNamibia okwaadha elalakano kwaakale nande omaso gaantu taga etwa komukithi gwendapi omukuziilile moombwa sho ta ku kathikwa komumvo 2030.

Metseyitho lyopashigwana ndyoka lya gandjwa, elelo ota li indile opo aakalimo ya longelekumwe naamboka taya wende iinamwenyo yo ya kwashilipaleke kutya oombwa nuumbi auhe owa tuntililwa pomahala ngoka ga tulwa po gomatuntili miikandjohogololo.

Kapuka okwa ti oshikonga shotuntila otashi ka kala ko uule womasik ugatatu, moka tashi ka Tameka koshikandjohogololo Oshakati West Rural, okuza momasiku 11 Mei, ta ku landula Oshakati West Urban, momasiku 12 Mei osho wo Oshakati East momasiku 13 Mei.

Okwa ti omatuntilo ngoka goshali otaga tameke ongulonene okuza po09H00 sigo 12:00, osho wo okuza po 14:00 sigo 16:30.

Kapuka okwa ti, shi ikwatelela kelandulathano ndyoka lya tulwa po koshikondo shuukalinawa wiinamwenyo, aanambelelwa otaya ka enda momikunda, momalukanda osho wo moosenda dha yooloka mOshakati.

“MOshakati West Rural, oosenda dhomatuntilo ongaashi; Okaukamasheshe Cucashops, Uuthilindindi Centre, Okamule Uukwiwonge Centre, Oshikolongondjo Omupanya Cucashop, Oshihenge Osheela Cucashop nUupindi Centre” ta ti ngaaka. 

Mondoolopa omahala gotuntila mOshakati West omwa kwatelwa Oshikango Kindergarten meEkuku, oSwapo Party Office puAnkambya, Dudex Bar meEhenye, osaala yiingongi mOneshila, nomalukanda galwe mEvululuko noOkandjengedi.

Kapuka okwa ti mOshakati East, aakalimo oowenda dhiimuna otaya vulu okudhi mona pomahala nga: Okaku Kiipupu Shimbangu, Oshandumbala Ondjele Centre, Omeege Omahanene Centre, Likuku Onembwata Centre, Omusimboti noOshinyadhila No.1.

Okwa ti wo oshikonga shika otashi lalakanene okugamena aantu niinamwenyo komukithi gwendambi, ngoka gu li gwa nika oshiponga nomudhipagi sho hagu taandele okuza miinamwenyo ya kwatwa okuya kaantu uuna ya lika kiinamwenyo mbyoka nenge ya kwalwa kiinamwenyo oyo tuu mbyo.

Kapuka okwa indile opoaakalimo mboka ye na omapulo nenge taa pumbwa uuyelele wa gwedhwa po ya kwatathaneke noshikondo shuuhaku wiinaymwenyo nombelewa mOndnagwa kongodhi 065 240 833.