Omulumentu a tindilwa ombooloha sho ta fekelelwa ekwatonkonga nokuteta uukiintu wohonda ye

Omulumentu gwomimvo omi-34 gwomOndangwa ngoka ta fekelwa okudhenga nokukwata omukadhona gwe koonkondo, manga taku hokololwa e mu ningile omatilitho goku mu dhipaga nokuteta iilyo ye yopaumwene nombele yOkapi, okwa tindilwa ombooloha. 

Shinene Ndaudako Frazelina okwa holoka lwotango mompangu yamangestrata yomOndangwa mOmaandaha komeho gamangestrata Nelao Ya France, ta tamanekelwa oshipotha shekwatonkonga, omatilitho gokuponokela osho wo eponokelo nelalakano lyokweehameka olutu unene, iipotha ayihe mbika oyi li papogolo lyoveta yomomagumbo (Domestic Violence Act). 

Ekwatonkonga lyoludhi nduka taku hokololwa olya ningilwe momasiku 1 gaJuli mOshaakondwa moshitopolwa shaNdangwa.

Epangelo otali tamaneke kutya Frazelina, shaa li paveta nopashiningilawina, okwa kwata omukadhona gwe onkonga mokulongitha oonkondo dholutu, mwa kwatelwa oku mu dhenga noongonyo moshipala nokoomatutsi osho wo okuteta uukiintu we nombele yOkapi.

Eponokelo eyehameki

Moshipotha oshitiyali, omutamanekwa ota geelelelwa iilonga yomatilitho gokuponokela. Omutamaneki gwepangelo, Christa Nauises okwa popi kutya omutamanekwa okwa ningi omatilitho gokudhipaga omunyenyeti nokuteta uukiintu we, shoka sha ningitha omunyenyeti a kale a itaala kutya oku na elalakano osho wo omilandu dhokugwanitha po omatilitho ngoka. 

Oshipotha oshititatu otashi hokolola eponokelo nelalakano lyokweehameka unene kolutu, shoka sha zi meponokelo olyo tuu ndyoka lyombele, moka epangelo lya popi kutya olya ningwa nelalakano lyokweetitha oshiponga oshinene kolutu.

Sho a holoka mompangu lwotango, Frazelina okwa tokola okwiipopila ye mwene moshipotha konima sho a tseyithilwa uuthemba we wokukala e na omukalelipo gwopaveta. Epangelo olya pula oshipotha shi undulilwe komeho opo ku vule okutsikila nomakonakono, nokwa tindi ombooloha, tali popi kutya omunyenyeti oku na uumbanda womwenyo we osho wo kutya okumangulula omutamanekwa itashi tsu kumwe nuuyuki. 

Ya France okwa undulile oshipotha shika komasiku 2 gaNovemba opo ku tsikilwe nomakonakono.