Ompangu yeindilo lyomboloha yaShikwaya ya undulilwa kuJuli

Eindilo lyomboloha lyomutamanekwa gwoshipotha shedhipago Petrus Shikwaya oya tsilikwa sigo omasiku 23 no-24 gaJuli 2026, konima sho ompangu ya pulakene uumbangi uule womasiku gontumba mOmpangu yaMangestrata mOndangwa oshiwike sha piti. 

Eundulo ndika olya ningwa konima sho omukuluntukonakoni gwopolisi Antonious Gabriel a gandja uumbangi mboka tawu kwatakanitha Shikwaya niiyemo mbyoka taku tiwa oya kuthwa melongongelokumwe lyuulunga womanyandeko gwoodola dhaNamibia oomiliyona mbali oshinkwanu shimwe (N$2.1 million) moSanlam, ndhoka aakonakoni taya dhiladhila kutya odhi na ekwatathano nedhipago lyomutamaneki gwomOndangwa nakusa Justine Shiweda.

Gabriel okwa hokololele ompangu kutya omakonakono gopolisi oga mono iipambumwaalu yiimaliwa mbyoka taku tiwa iiyemo ya kuthwa muulunga wa tya ngaaka, ya longithwa mokulanda iikulya positola yo-KFC, omalandithilo giitungitho, niinyangadhalwa yilwe mbyoka taku tiwa Shikwaya nooyakwawo oya mono mo omauwanawa. Epangelo otali popi kutya Shikwaya okwa lila Sanlam omanyandeko gwoodola dhaNamibia omayovi 154 000 konima sho a kundaneke iilombo kutya okwa li a kwatelwa moshipangelo omolwomanyutu.

Mokutinda egandjo lyomboloha, Gabriel okwa gandja uumbangi kutya Shikwaya okwa mona uuwanawa kiiyuulikwa mbyoka taku tiwa oya landwa niiyemo yomanyandeko, mwa kwatelwa oshihauto sho-Volkswagen Polo ooshisiliveli noshikandjo shuunamapya popepi nOvenduka, mbyoka a ti okweyi landelwa ku hekulu, Abner Matheus. “Omwiindili okwa mona uuwanawa mokupewa oshihauto sho-Volkswagen Polo oshisiliveli shoka a landelwa ku hekulu, noshikandjo shuunamapya popepi nOvenduka,” Gabriel osho a hokololele ompangu.

Okwa tsu wo omuthindo kutya aantu oyendji mboka ya kwatelwamo moshiningwanima shuulunga womanyandeko oya lundululile iimaliwa kuMatheus, mbyoka yimwe yomuyo ya ka pita mokambo koombaanga kaShikwaya. Shikwaya oku li a taalela iipotha mbyoka ya kwatela mo edhipago, okuhangana nelalakano lyokudhipaga, uulunga womanyandeko, iinyangadhalwa yokulundulula iimaliwa yuulunga, nosho wo okuya omulandu gwiilonga yuuyuki moshipala.

Oku li gumwe gwomaatamanekwa yahamano mboka taya kuutumbilwa medhipago lyaShiweda, ngoka a hulitha muFebuluali gwomumvo nguka konima sho a yahwa nokutilwa uuzigo woasiti muKotoba gwomumvo gwa zi ko.Omutamaneki gwEpangelo Yeukai Kangira oku li omukalelipo gwEpangelo, manga Mangestrata Kaeren Kleopas oye ta pulakene oshipotha shika. Omugamenihahende Murray Shikongo oye a kalela po Shikwaya.