Okanonamati komimvo 6 ke li moombete sho ka ponokelwa koonyushi koskola mOshikoto

Lionel Hamwele, omunamimvo 6 oku na omeho ga pata konima nkene a ponokelwe koonyushi pamwe naalongwa yakwawo osho wo aalongi popilimasikola Ethikilo moshitopolwa shaShikoto Omaandaha ga ziko. Eponokelo ndika olya etitha a kwatelewe moombete moshipangelo Onandjokwe, naakawanezimo ota ya galikanene eeluko lye. 

Pethimbo oshifo shoNamibian Sun she mu talelepo moshipangelo mEtitatu, Lionel ngoka e li mondondo yotango okwa li a lala meimweneneno mombete ye noshipala sha zinda  noonkondo. Sho edhina lye lya tumbulwa, okwa tala handiya omolwa uuwehame nokweehena oonkondo dhoku makuka. Yina nakumuvala Priskila Lukas okwa kala pooha dhe, te mu thula nuukeka moshipala nomahaisa opo uuwehame nozindo yi shune pevi. “Aapangi oya tseyithile ndje kutya ota kala nawa. Onda hala owala omeho ge ga patuluke ishewe”,Priskila ta ti.

Itaa dhimbululwa we

Eponokelo olya holoka lwopokati komutenya mOmaandaha ga ziko, konima sho ehunga lyoonyushi lyi adha momudhingoloko gwosikola. Omanga yalwe ya li ya lika wo, Lionel oye a ehamekwa uunene muyakwawo. “Ngaye ondeshi kundanekwa lwopo omu-11 yongula kutya omumwandje okwa lika koonyushi omanga e li kosikola”, David Hamwele ngoka e li  he ya Lionel ta ti. 

Hamwele okwa ti, omukuluntusikola ngoka a hokolola eponokelo onga ewinayi noonkondo, okwa yi komeho nokwiiyamba opo a yambidhidhe aakuluntu ya Lionel nekwatho lyopashimaliwa a vule a ka pangwe kOnandjokwe. “Sho nda thiki poshipangelo, omwenyo gwandje ogwa zi pehala oshoka kandali tandi vulu okudhimbulula omumwandje,” Hamwele ta popi noluhodhi. “Onda lila nokulila”, ta gwedha ko. 

Okwa ti okanona okazindi sha pitilila, ita ka vulu we noku dhimbululwa . “Oshipala osha zinda, osho wo oompadhi noonyala dhe. Onda lombwelwa kutya oonyushi ndhoka odha kala po okathimbo posikola, ashike inandi tseya kutya oshike sha etitha opo dhi ponokele aantu na omolwashike inadhi tembudhwa nale mbala.

Lukas okwa tseyithile oshifo shoNamibian Sun mEtine kutya Lionel okwa piti e li po hwepo, ashike ina tonata natango omolwa ozindo. Okwa gwedha ko kutya onga aavali, kehe esiku ota ya tula omutima mombinzi noye na omukumo kutya okamonamati kawo onaka ka pahuka ishewe. 

Okukala ohanda nomukundu

Oshiningwanima shika osha gongaleke omapulo oku za mokati kaavali shi nasha noonkatu dhegameno dhili posikola nongele ehunga ndyoka olya kala lyi shiwike omanga inaa li ka ponekela aantu. mEtitatu, aavali mboka ya li ya limbililwa oya gongala posikola opo ya ye moshigongi. Aanambelewa yokuuministeli gwOmidhingoloko, Omakuti nOmapashiyono oya pondola oku tembudha oonyushi ndhoka, opo aanasikola ya wape oku galukila kootundi mesiku lya landula ko. Omukuluntusikola okwa tindi oku za mokalungu nokwa indile opo omapula agehe gopaikundaneki ga ukithwe koombelewa dhopombanda dhuuministeli welongo moWindhoek.