Elelo lyondoolopa yaNdanwa lya thindikile Sankwasa ombaadhilila kOvenduka sho a thigwa po konelomba.

Elelo lyondoolopa yaNdangwa olya tindi okweeta puuyelele omwaalu goshimaliwa gwa longithwa molweendo lwombaadhilila ndoka ominista yomapendulepo giilando niitopolwa yokomikunda James Sankwasa a li a kutha mEtine lya zi ko konima sho a li a thigwa po kondhila.

Shika osha eta omapulo ogendji kombinga yelongitho mondjila lyoonzo dhelelo lyondoolopa unene sha Sankwasa a kala nokutsa omuthindo komilandu dhelongitho lyoshimaliwa osho wo okukala oshimpwiyu kaaleli yiilando- mwa katelwa omauwanawa gawo ngoka taga nikwaanikwa ga fa gaali nawa.

Oshinima shika osha tameke ongulohi yEtine.sho Sankwasa a ndopa okuthika pethimbo pokapale koondhila kaAndimba Toivo ya Toivo ye okwa li okutuka nodhila po18:00 a shune kOvenduka. Sankwasa okwa li mOndangwa ta kwatelekomeho oshigongiilonga shaaleli yilando noyopashitopolwa uule woshiwike. 

Minista okwa lombwele Namibian Sun kutya ka li a tala nawa ethimbo lyokuya kokapale oshoka okwa li owala e were ke li popepi. 

“Onda li ndishi sho ndi li mOndangwa, nokapale oke li popepipepi, tandi matukile po ike nzoyanziya nande ethimbo oli li ko eshona,” ta ti ngaaka.

Sho a thiki, okwa adha nale mboka ye na okumu ndhindhilika ya pata. Omuhingi gwe okwa adhika a shuna nale kOvenduka, oshoka minista okwa li a longekidha olweendo nondhila. 

Nonando okwa li kwa longekidhwa ootundi dhi na sha nelongitho lyoshimaliwamEtitano, dhoka dha li dha talika ko dha simana unene, odha undulilwa koshiwike sha landula-Sankwasa okwa pula opo elelo lyondoolopa li mu kwathele nolefa.

Elelo lyondoolopa olya longekidha osheenditho sho Toyota Fortuner okuza mombelewa yamayola, nosha hingwa uusiku okuya kOvenduka komuniilonga gondoolopa ngoka ha longo onga omunambelewa gomapendulepo gopaliko mondoolopa. 

Oshimaliwa sha longithwa ina shi popiwa

Nonando Sankwasa a kala mootundilongo, opwa kala omapulo kombinga yoshimaliwa sha longithwa molweendo nduka. 

Omapulo kombinga yoshimaliwa shomahooli golweendo konyala ookilometa 700 osho wo oshimaliwa shomauwanawa gomalweendo ga futwa omuniilonga gondoolopa inaga yamukulwa. 

Omunambelewa omukuluntu gwelelo lyondoolopa yaNdangwa Ismael Namgongo okwa tindi okutya kosha kombinga yelongitho lyoshimaliwa.

Okwa ti: “Popya naminista kombinga yomalongekidho golweendo lwe. Ihandi longele iilonga yandje miifokundaneki”.

Okalamauka kombinga yokatekete inaa ka longithwa

Sankwasa okwa ti okuthigwa po kwe kondhila itaku eta ekanitho lyoshimaliwa sha sha oshoka okatekete ok aka kalongithwa natango lulwe.

Ta ti: “ Oshimaliwa inashi kana oshoka okatekete ota ka vulu okulongithwa monahiya”.

Ashike omapopyo ga zi meni lyehangano lyoondhila lyoFly Namibia olya ti omilandu dhi li po odho dhino kutya uuna omuntu a andopa okuthika pethimbo okatekete ke ota ka talika ko onga ka longithwa onkene okuna owala okuka landululwa okatekete kamwe. 

Okalamauka haka oka eta oondjuma kombinga yelongitho lyoshimaliwa shoshigwana shoka sha heap nosha li shi na okukala sha longithwa minima yilwe. 

Omapulo kombinga yelongitho lyoonzo dhelelo lyondoolopa

Okwa kala nomaipulo kombinga yelongitho lyoonzo dhelelo lyondoolopa ngele osha uka tuu okulongithwa monkalo ndjika. 

Onga ominista ya ninga oshinakugwanithwa okutonatela omalelo gondoolopa, Sankwasa okuna wo oshinakugwanithwa okuhwahwameka elongithonawa lyoonzo dhoshimaliwa nokukwalipaleka elongitho lyomondjila momalelo giilando nogiitopolwa. 

Minista okwa hokolola oshiningwanima shika kutya “epuko lyaashi lyoshiningilwawina” ta ti elelo lyondoolopa olya li ashike ta li mu kwathele okugwanitha po iilonga ye yopashigwana. 

Okwa ekelehi omapopyo kutya hasho Oshinima sha gwana miifokundaneki tati omapulaapulo moshinima muka oga nika opolitika. 

Elelo lyondoolopa ina li koleka ngele omunambelewa a hingi minista okwa li tuu a pewa epitikilo lyokolela okuhinga minista, osho wo ngele ominista yomapendulepo giilando niitopolwa yokomikunda otayi ka futa elelo lyondoolopa oshimaliwa sha lyo shoka lya longitha momahooli, mesiloshimpwiyu lyosheenditho osho wo omauwanawa gomalweendo. 

Sankwasa okwa koleke kutya hasho oshikando sho tango ta hingwa komuniilonga gwelelo lyondoolopa.