CRAN ta kwatakanitha omikunda dhomoKunene

Momasiku 30 Januali 2026, Communications Regulatory Authority of Namibia (CRAN) okwa tula miilonga pambelwa etenda lyonetwork etiyali kohi yopolojeka the Universal Service Fund (USF), sha ningwa nepatululo lyetenda lyedhina Ehomba Tower moshitopolwa shaKunene. 

Epatululo lyetenda po Ehomba olya landula epatululo lyetenda mEpinga moshitopolwa shaHangwena pashilipaleko lyoshimaliwa shoUSFA ndyoka lya li lya ningwa muNovemba2025. Oopolojeka dhika otadhi lalakanene okukwashilipaleka eitulemo lyepangelo mokukwashilipaleka kutya aakwashigwana unene tuu mboka yokiitopolwa yoluushayi ya mone uuyelele nuutekinika wopashinanena womakwatathano.

Ngoloneya goshitopolwa shaKunene Vipakuje Muharukua okwa ti opolojeka ngandjika oya simana unene kehumokomeho lyoshitopolwa osho oshilongo ashihe

“Nena otwa patulula etenda lyonetwork lyoCRAN Universal Service Fund mpaka pEhamba notweegulula ihe ngeyi oompito dhaandjuka kaaKunene. Etenda ndika lyonetwork, ka li ashike etenda lyomakwatathano ndele ota li kwathele okutunga elongo, eliko nokukala twaa li konima yesiga ngele tashi ya pomalungula”.

Minista yomauyelele nomakwatathano gopaungomba Emma Theofelus okwa ti etenda lyomakwatathano ota li ulike ehumukomeho li iwetikile mokukwashilipaleka kutya shoka sha thanekwa osha tulwa miiilonga. 

“Epatululo lyetenda lyomakwatathano ota li ulike kutya epangelo olyiitulamo okukwashilipaleka kutya omukwashigwana okwa mona ompito yokulongitha uungomba nokwaadha omalalakano gondjodhithaneko yehumukomeho onti-6 (NDP6) ndjoka tayi lalakanene ehumokomeho muungomba nomakwatathano gopamalungula. Eegululo ndika lyetenda lyomakwatathano pEhomba, okuulika shili kutya okukwatelamo aantu ayehe momahumokomeho gopaungomba ka shi li owala mokana nenge moombapila ndele osha tulwa miilonga miitopolwa moka sha pumbiwa unene”.

Omukuluntuwiliki go CRAN Emilia Nghikembua, okwa ti etenda ndika ota li eta elunduluko mEhomba nomikunda dhopuushiinda.

“ Olya egulula ihe ngeyi oompito dha mbwalangandja koongeshefa dhi mone aalandi oyendji, aanasikola yam one oonzo dhiilongwa naandhoka dha pamba uundjolowele osho wo omazimo niiputudhilo yilwe yi vule okweendathana momukalo omupu,” Nghikembua ta ti ngaaka.