Yatata ya mangwa sho ya kambadhala okuyakela iingangamithi mondjeedhililo

Aakiintu yoomvula 21,29 no38 oya tulwa miipandeko mEtiyali moWindhoek Central Prison, pethimbo ya kambadhala okupititha meni lyodholongo iinima mbyoka yiindikwa ngaashi iingangamithi, omakaya oshowo oocelula.
Omukiintu gwoomvula 38, ngoka a za moGobabis okwa longitha okanona ke kokakadhona koomvula 10 oko ka pitithe iinima mbyoka omanga iingangamithi yocannabis noocelula 4 dha adhika woo nomukiintu ngoka.
Okwa li ta kambadhala okugandja iinima mbyoka komumwayinagona ngoka eli mondjeedhililo.
Sho ya pulwaapulwa kopolisi , mumwayinagona ngoka okwa popi kutya omukiintu ngoka omukulukadhi gwe, naasho oshifokundaneki shika sha thiki pehala mpoka osha adha okanona hoka ka longithwa keli miikaha yomuhungimwenyo.
Moshiningwanima oshitiyali omukiintu gwoomvula 21 okwa dhika noopela dhoMandrax dhili 49 oshowo ocannabis, mbyoka a kambadhala okuyaleka mondjeedhililo kukuume ke.
Okwa popi kutya ye nakuume ke oya za pomudhingoloko gumwe na okwe mu tumu opo e mu etele iinima ye, ihe sho ya pulwaapulwa, omunadholongo ngoka e li mondjeedhililo omolwa oshipotha shomuyeka kwahomatiwa okwa ipatana kutya ke shi omukiintu ngoka.
Moshiningwanima oshititatu, omukiintu gwoomvula 29 okwa kambadhala okuyakela ohonda ye omakaya.
Omulumentu ngoka okwa tegelela epangulo omolwa iipotha yekwatonkonga nedhipago
Sho a ningiwa omapulaapulo okwa popi kutya ota tekula okanona ke nomulumentu ngoka koomvula ndatu.
Omupevi Komufala gwOodholongo, Tuhafeni hangula okwa popi kutya mboka taya yakele iinima inayi pitikwa moodholongo otaya yay i moshipala enzulonkalo lyookwatwa.
“Ayehe mboka aakiintu. Otwa pumbwa okudhimbulukitha oshigwana kutya inashi pumbwa okuhanagulapo aaholike yawo niinima mbyoka inayi pitikwa,” Hangula ta ti.
Aakiintu mboka oya taalela iipotha ya yooloka, naHangula okwa okwa kunkilile oshigwana opo shi hulithepo omikalo dhoka.
GORDON JOSEPH