Yatano ya monika ondjo moshipotha shekengelleo lyoAvid

Okuya pehulilo lyoompangu moshipotha shekano lyiimaliwa yoAvid, shoka sha tamekele momvula yo 2005, ompangu yopombanda yaVenduka oya mono ondjo Nico Josea, nakusa Lazarus Kandara oshowo OmuSouth Afrika, Alan Rosenberg, moompangela dhawo dhokukengelela okomisi yoSocial Security Commission (SSC) oshimaliwa shomapungulo sha thika poomiliyona 30.

Josea okwa monika ondjo moshipotha shuulunga nompangu oya mono kutya okwa longele pamwe naKandara oshowo Rosenberg na kali e na elalakano lyokushunitha oshimaliwa shoka sha pungulwa koSSC mehangano lyoAvid investment company.

Oshimaliwa shoomiliyona 28.5 shi li oshitopolwa shepungulo ndyoka odha lundulululwa kehangano lyoNamangol Investments, moka Josea oye e li omukondololi awike gwehangano ndyoka onga omunambelewa omukuluntu. Ompangu oya mono kutya ope na uumbangi wa gwana kutya Josea pethimbo ta longele kumwe naKandara oshowo Rosenberg okwa kala e na owino nontseyo kutya iimaliwa yoSSC mbyoka ya kuthwa.

Omupanguli Christie Liebenberg okwa tindi eindilo ndyoka lya ningwa komukalelipo gwaHosea, hahende Slysken Makando, opo omboloha yaJosea yikalepo, nomupanguli okwa tokola opo Josea a kale mondjeedhililo yopolisi sigo esiku ta pewa egeelo lye.

Omukomeho gwehangano lyoAvid Kandara okwiiyahele komeho yondjeedhililo yaVenduka konima yoowili ooshona sho a tulwa miipandeko momasiku 24 gaAguste mo 2005.

Aatamanekwa yalwe moshipotha shoka Paulus Kapia, Inez /Gâses naRalph Blaauw – oya monika ondjo omanga Sharon Lynette Blaauw naJosea ya monika ondjo yuuhasha nuulingilingi mokuya pondje oompango dhomahangano.

Omboloha yawo oya shunwa po noshipotha osha undulilwa komasiku 16 gaMei.

Osha monika mo kutya Sharon Blaauw okupitila mezimino lyemwene osha shaina uutokolitho uwali mboka wa tula moshipotha Avid.

Okwa kengelele kutya okwa li oshitopolwa shoonakuninga omatokolo omanene gopangeshefa sho a shainwa uutokolitho mboka omanga eshi shi kutya ka li oshitopolwa.

Omupanguli Liebenberg okwa popi kutya

Sharon Blaauw okwa ndopa oshinakugwanithwa she onga omukomeho moAvid na okwa monika ondjo muuhasha nokuya pondje oompango dhehangano.

Hahende Otniel Podewiltz oshowo komanda nale moshikondo shegameno, Matias Shiweda inaya monika ondjo.

Omupanguli okwa tsikile kutya ekengelelo lyiimaliwa ndyoka lya ningwa kuJosea olya piti omolwa omukalo ngoka iihumbata pangeshefa moNamangol Investments sho a kala ta ungaunga nepungulo ndyoka. Ina ninga eyooloko pokati kemwene nongeshefa.



Omupanguli okwa popi kutya ongeshefa yaNamangol oya ungaungiwa nayo pambambo nomuukengeeleli nomalalakano gokukanitha iimaliwa mbyoka ya nuninwa epungulo.

Okwa tsikile kutya kape na uumbangi wa gwana kutya aatamanekwa yalwe, Paulus Kapia, Inez /Gâses, Otniel Podewiltz, Sharon Lynette Blaauw, Ralph Blaauw oshowo Matias Shiweda – oya li ye na owino nomalalakano gokukengelela iimaliwa yoSSC.

“Onkene pamaiyuvo gandje kandi wete ya pumbwa okupewa uusama mekano lyoshimaliwa shoomiliyona 30 shaSSC,” Liebenberg a tumbula.

Okwa tsu omuthindo kutya Josea oye ta pewa uusama awuhe molwaashoka oyiimanga kumwe naKandara opo ya kuthepo oshimaliwa shoka shomapungulo, nokushilongitha paumwene.

Liebenberg okwa tsikile kutya aatamanekwa yamwe mboka yiipetha ondjo mekengelelo lyiimaliwa mbyoka oomenindjela yoSSC Avril Green, Gideon Muller oshowo omunambelewa omukuluntu Tuli Hilvelua mboka ya gandja otendela koAvid.

Omupanguli okwa popi kutya nonando inaya mona mo sha mekengelelo ndyoka, omatokoloo gawo oga gandja ondjila kengelelo lyiimaliwa mbyoka na itaya hupu megeelo.





Kombinga yaShiweda, omupanguli okwa popi kutya pamaihumbato ge kape na uumbangi tawu holola kutya okwa kala tiihumbata nomalalakano gokukengelela.

Okwa tsikile kutya sho Shiweda a dhidhilike kutya pe na uulingilingi na okwa ndopa okukatuka oonkatu dha landula omalimbililo ge ngoka, epungulo ndoka olya li nale lya pitithwa nuulingilingi owa li nale wa longwa.

FRED GOEIEMAN