Ya Toivo ota fumbikwa ngula

Oshilongo osha tamekitha pambelewa omasiku gane gokuulika oluhodhi omolwa eso lyependafule lyaNamibia, Andimba Toivo Ya Toivo ngoka ta fumbikwa ngula pOmawendo gOmapendafule mOshilandopangelo. Ya Toivo ota ningilwa efumbiko lyopapangelo, taku tamekiwa noshituthi shokumudhimbuluka shoka tashi ningwa nena pOkapale kEmanguluko mOvenduka, na okwa tegelelwa shi kanane aalilisa oyendji okuza koombinga noombinga. Ya Toivo okwa hulitha momasiku 9 gaJuni, mepupi lyoomvula 92. Omupopiliko gwofalimi, Helmut Angula okwa popi kutya aanambelewa ya za kiilongo ngaashi Cuba, Zimbabwe, Angola oshowo South Africa, hoka Ya Toivo a kala oomvula 16 mondholongo yaRobben Island, okwa tegelelwa ya ka kale poshituthifumbiko. Ominista yaSouth Afrika yOmakwatathano, Ayanda Dlodlo otayi ka kalelapo omupresiende Jacob Zuma pefumbiko.Okwa ningwa iituthi ya yooloka omolwa esikumaneko lyaYa Toivo moshilongo ashihe. Okwa ningwa oshituthidhimbuluko she mOndangwa oshiwike sha piti, omanga Okaiti noRundu nayo ya ningi iituthi yokudhimbuluka ependafule ndyoka lyaNamibia. MoSouth Africa, oNelson Mandela Foundation nayo oya ningi oshitthi shokudhimbuluka Ya Toivo mEtiyali, shoka sha ningilwa moJohannesburg. Ya Toivo okwa hokololwa kutya okwa li kuume kaNelson Mandela na oya kala pamwe oomvula odhindji mondjeedhililo yaRobben Island. Elelo lyoshilando shaVenduka okwa hololwa tali ka gandja omayakulo goombesa kaakwashigwana okuza pomahala ga yooloka moshilongo mboka ya hala okukala poshituthidhimbuluko oshowo efumbiko. Oshituthishimbuluko shoka tashi ningwa nena otashi tameke potundi onti-12 noshifokundaneki shoNamibian Sun osha nongele kutya otaku longithwa oshimaliwa sha thika poomiliyona 3 melongekidho lyoshituthidhimbuluko nefumbiko lyaYa Toivo.Amushanga gwokabinete okwa hololwa a pula oshiketha shiiyemo yepangelo, momukanda ngoka guukithwa kuamushanga gUuminiteli wEmona, Ericah Shafudah, opo ku gandje oshimaliwa shoka sha nuninwa omalongekidho gefumbiko.George Simataa okwa pula opo oomiliyona dhoka dhi tulwe komayalulo gombaanga goHeroes' Acre. Simataa okwa popile eindilo lyoshimaliwa shoka kutya elongekidho lyiituthi yoludhi ndoka ohali pula oshimaliwa oshindji, ngaashi okunwa, omalweendo, omayakulo gefumbiko, omatseyitho goparadio nenge kotiivi oshowo omahala gokulala aalilisa yamwe po unene aanenentu.Omalongekidho ngoka ohaga ningwa kokomitiye yopashigwana yakwatela mo oohamushanga yiikondo ya yooloka oshowo iilyo yomaleo giitopolwa na otayi kwatelwa komeho kuamushanga gwokabinete. Simataa okwa popi kutya ohaku ningwa omakonaakono kombelewa yomuyalulimambo gwepangelo, opo ku talike kutya iimaliwa mbyoka oya longithwa ngiini.OMUTOOLINKUNDANA GWOMENI/CATHERINE SASMAN

Ya Toivo ota fumbikwa ngula

Comments

Namibian Sun 2026-01-14

Please login to leave a comment

Ya Toivo ota fumbikwa ngula

Comments

Namibian Sun 2026-01-14

Please login to leave a comment

Subscription Required to Access Content ×

Login

Subscription Required to Access Content