Ya pitililitha omwaalu gwaanaskola moongulu

Omukomeho gwelongo mOshitopolwa shaHangwena, Isak Hamatwi, okwa koleke kutya oya tula mooskola aanaskola yondondo o-11 ya pitilila moongulu dhoskola omolwa omwaalu omunene gwaanaskola mondondo ndjoka moshitopolwa. Okwa popi kutya onkalo ndjoka inayi guma owala aanaskola yondondo onti-11 ihe naanaskola yondondo onti-8 naamboka taya endulula ondondo onti-10.

Omukundu ngoka ogwa holoka sha landula iizemo tayi shambula mbyoka ya ndulukwa koshitopolwa shoka, mekonaakono lyondondo onti-10 omvula ya piti, sho aanaskola ya thika po- 3 154 taya yi kondondo onti-11 ihe aanaskola owala 2 750 taya mono omahala ngele okwa longithwa omulandu gwaanaskola owala 40 mongulu yoskola.

Shoka otashi etitha aanaskola ya thika po-404 kaaye na omahala onkene onkalo ndjoka oya dhiminike oshitopolwa shi thinaneke aanaskola moongulu dhoskola.

Nonando aanaskola oya tulwa moongulu ya thika po 47 natango okwa hupu aanaskola 160 mboka ya tumwa koskola yaShituwa. Hamatwi okwa popi kutya Shituwa okuna omahala ga gwana, uupyakadhi owa etithwa owala kutya otaya longitha po oongulu dhoskola dhimwe onga omuhandjo. Okwa popi kutya oshitopolwa natango otashi kondjo opo shi kandulepo omukundu gwomuhandjo gwaanaskola 40 poskola Ondobe Senior Secondary School. Opo ku kandulwe po omukundu ngoka otaya ka kutha mo ondondo onti-8 mooskola dhimwe po ngaashi Eenhana Senior Secondary noHaimbili Haufiku Senior, dhoka tashi ka kala owala nondondo onti-10, 11 no-12.

ILENI NANDJATO