Ya pewa omboloha yooN$4 000

Aalumentu yane mboka ya li ya tulwa miipandeko momwedhi Juni, konima sho ya dhenge omulumentu gwoomvula 28 mongeleka pOdibo, ngoka a hulitha lwanima oya pewa omboloha yoshimaliwa shooN$4000 kehe gumwe nomakonaakono goshiyetithi sheso inaga vula okuulika kutya oshike sha titha eso lyomulumentu ngoka.

Aafekelwa mboka oya tumbulwa komadhina kutya Matias Nakale oshowo Petrus Weyulu Mweendobe, ayehe yoomvula 21, naafekelwa yaali yoomvula 17. Mboka oyali ya tulwa miipandeko omolwa eso lyaTitus Kaluvi ngoka a ponokelwa mongeleka yaAnglican mOdibo moshitopolwa shaHangwena momasiku 9 gaJuni. Kaluvi okwa hulitha pethimbo a thiki poshipangelo sha St Mary's shoka shi li owala oometa dhotumba okuza pongeleka ndjoka.

Nonando ongaaka oshifokundaneki shoNamibian Sun osha nongele kutya aafekelwa mboka itaya tamanekelwa we oshipotha shedhipago ihe oshipotha shedhengo sho onzapo yeso ya holola kutya oshiyetithi sheso lyaKaluvi inashi vula okumonika.

Omolwa oshipotha oshipe shoka ya taalela, aafekelwa mboka oya ningi eindilo lyomboloha na oya pewa omboloha yoshimaliwa shooN$4000, kehe gumwe, mompangulilo yaMangestrata mOhangwena. Shoka oha uvitha nayi ofamili yanakusa ndjoka ya popi kutya aafekelwa oya dhenge Kaluvi miipathi yaantu oyendji na kaya uviteko kutya omolwashike oshiyetithi sheso inashi vula okumonika.

MuJuni omunambelewa omupopiliko gwopolisi yaHangwena, Warrant Officer Abner Itumba okwa lombwele oNamibian Sun kutya aafekelwa mboka oya yi mongeleka lwopotundi onti 00:45 moka mwa li mu na ohungi yiilyo yoStudent Christian Movement (SCM).

Sho ya yi mongeleka ndjoka, Kaluvi okwe ya pula opo ya kutheko ombale gawo komitse ihe oya tokola okuya pondje, na omanga ya li taya piti pondje, Kaluvi okwa kambadhala oku edhila omweelo gwongeleka. Aafekelwa mboka oye mu nana melapi lye lyomothingo na oya tameke oku mu dhenga.

Ofamili oya popi kutya kape na uumbangi kutya nakusa okwa li e na uuvu wontumba.

“Kashi li mondjila omuntu gwetu a dhengwa nokuhulitha lwanima ihe oonakumuponokela miipathi yaantu oyendji oye li yamanguluka sho ya pewa omboloha. Otwa hala uuyuuki meso lyaKaluvi osha hala okutya ngiini sho taya ti oshiyetihi sheso inashi monika” Sho a ningilwa omapulo, Itumba owa popi kutya ngele ofamili inayi pandula oshizemo shoka, nayi ka konge ekwatho komunambelewa omukonaakoni gwoshipotha shoka opo ya vule okufalwa komundohotola ngoka a ningi omakonaakono ngoka, e ya yelithile.

Okwa popi kutya osha pumba noonkondo opo ku kale inaku monika oshiyetithi sheso, pethimbo lyomakonaakono ihe ohashi vulu okuholoka. Itumba okwa popi kutya omakonaakono onkene taga tsikile moshipotha shoka, okutya owala aafekelwa itaya pangulilwa we oshipotha sheso ihe oshipotha shedhengo.

KENYA KAMBOWE