Ya hala oloogolo lu kuthwe ko kondama yaakwashigwana

Aakalimo yomomukunda Ohakweenyanga oshowo omikunda shopuushinda oya ningi ehololomadhilaadhilo mehuliloshiwike lya piti, nokugandja omukandanyenyeto gwawo kOmbelewa yaNgoloneya gwaShana, taya pula opo ku kuthwe ko meendelelo ondhalate ndjoka ya tulwa kondama yaakwashigwana momukunda gwawo.Aakwashigwana otaya popi kutya sho ya taalela onkalo yoshikukuta, iimuna yawo kayi na mpoka tayi nu, sha landula sho ondama ndjoka ya tulwa meni lyolooholo komunambeshefa Tobias Kuutumbeni, sho a landapo ondama ndjoka oshowo ehala momukunda Ohakweenyanga.Sho a lesha omukandanyenyeto ngoka, Wilbard Nangombe, okwa popi kutya ondama ndjoka oyali ya ningwa po momvula yo 1957, onga uukwatelo womeya na ohayi kala nomeya konyala aluhe nokuhupitha iimuna yawo okuza kenota pethimbo lyomathimbo goshikukuta.Okwa popi kutya momvula yo 2015, mwene gwomukunda Oneleiwa, Silas Ndakolonghoshi, aniwa okwa landitha po ondama ndjoka opamwe noshitopolwa shevi shi li popepi komunangeshefa ngoka.Omunangeshefa ngoka aniwa okwa tula nduno meni lyodhalate ondama ndjoka momukunda Ohakweenyanga popepi neinda lyopolisi mOngwediva, nokupatela pondje aakwashigwana opamwe niimuna yawo opo kaya longithe ondama ndjoka.Nangombe pethimbo a lesha omukandanyenyeto ngoka okwa popi kutya pethimbo lyenota ngaashi ndika iimuna yawo oyali hayi nu mondama ndjoka, oshowo aakwashigwana oya li haya teke omeya okuza mondama ndjoka opo ya vule okulongitha momagumbo gawo. Oshigwana osha popi kutya ondama ndjoka oyoshigwana molwaashoka oyi li eliko lyepangelo. Kape na ngoka e na uuthemba oku yi landa nenge oku yi landitha po. Aanamukunda ya za momikunda ngaashi Elombe, Oneleiwa, Ohakweenyaga oshowo Efidilomulunga oya kutha ombinga mehololomadhilaadhilo ndyoka lya ningwa. Omvula ya piti, Ngoloneya gwoshitopolwa shaShana, Clemens Kashuupulwa, okwa hiya Omuprima Saara Kuugongelwa-Amadhila opo iidhope moshikumungu shoka.Kashuupulwa okwa lombwele Kuugongelwa kutya Kuutumbeni okwa li e na okuya tango moonkundathana nelelo lyoshitopolwa nokulandula omilandu dhomondjila mokwiimonenna evi nokutula po opoloyeka ye.Sho a yakula omukandanyenyeto ngoka, omugandjimayele gwowina gwaNgoloneya gwaShana, Michael Mwinga, okwa lombwele aahololimadhilaadhilo kutya sha landula etalelepo lyomuprima, ewi lyawo olyuuvika na otaya tala owala komapopyo ngoka ga ningwa kuNdakolonghoshi pethimbo nomutumba ngoka a ningi nomuprima. Osha lopotwa kutya Kuutumbeni okwa mono ondama ndjoka sho a futu Ndakolonghoshi oshimaliwa sha thika pooN$22 000, okwa futu woo oshimaliwa shoN$5 000 kelenga enene lyoshikandjo sha Onamutayi, Amon Shipanga noku kutha natango ondama pegumbo lye mOnamutayi. Okwa futa woo oshimaliwa shooN$11 000 kumwene gwomukunda Ohakweenyanga, Daniel Kayili.ILENI NANDJATO

Ya hala oloogolo lu kuthwe ko kondama yaakwashigwana

Comments

Namibian Sun 2026-11-13

Please login to leave a comment

Ya hala oloogolo lu kuthwe ko kondama yaakwashigwana

Comments

Namibian Sun 2026-11-13

Please login to leave a comment

Subscription Required to Access Content ×

Login

Subscription Required to Access Content