Ya hala iilonga

Hikera Muwara, Immanuel Kandundu oshowo Mushongoro Kamonga oya gandja ehokololo lyawo kNamibian Sun pethimbo lyetalelepo lya ningwa moDivundu ndjoka tayi adhika oshinano shookilometa 200 muuzilo waRundu.Aalumentu mboka oya adhika ya kuutumba metungo inali pwa, taya kundathana.Aalumentu mboka oya gandja omahokololo goonkalamwenyo dhawo taya popi kutya onkalo oye ya ningila odhigu na osha dhigupala okumona iilonga tayi kalelele.Divundu, otayi adhika komunkulo gwOmulonga gwaKavango, hoka taku adhika omagumbo ogendji gaayenda ngoka haga nana omwaalu omunene gwaatalelipo, otayi adhika woo popepi noBwabwata National Park.Kakele kaaniilonga yepangelo moDivundu, aantu oyendji oyiikolelela miilonga yomomagumbo gaayenda, moostola oshowo mboka taya landitha momapandanda.Osha hololwa omvula ya piti kutya, ondjele yokwaahena iilonga moshitopolwa shaKavango East oya thikama poopresenda 62.5.Aalumentu mboka yatatu oya popi kutya ohaya longo iilonga ngaashi okuhelula omaloli nenge okukwathela komatungo, ihe oompito dhoka odha pumba ngashiingeyi.“Ngaashi ngame onda li handi longo komatungo ihe ngashiingeyi kamu na oopoloyeka moDivundu, shoka osha hala okutya onda pumbwa oku kongaakonga ndi na einekelo ngele tandi mono iilonga opo ndi vule okuhupa,” Kandundu a popi.Okwa gwedha po kutya edhilaadhilo lyokukala ita vulu okupalutha aanona ye oshowo ofamili ye otali mu hepeke pamadhilaadhilo.“Onga omulumentu owa pumbwa okupalutha ofamili yoye ihe ngame itandi vulu okushininga. Ihandi kotha nombili ndi shi kutya ofamili yandje oyi na oompumbwe na kandi na shoka tandi vulu kuninga.”Kandundu okwa popi kutya ngele onkalo oya tsikile ngaaka, nena otaka thiminikwa opo a tembukile koondoolopa dhilye, a ka konge iilonga.Muwara okwa popi kutya oha kala a sa ohoni aluhe uuna ta shuna kegumbo e na oonyala dhowala, konima sho uuhala ta kongo iilonga esiku alihe.“Omathimbo gamwe ihandi hala nokuli okuya kegumbo molwaashoka onda sa ohoni, okuya kegumbo nokutaalela ofamili yandje, ndjoka yi na einekelo ndi shune kegumbo ndi na sha nenge onkundana kutya onda mona iilonga,” Muwara a popi.Kamonga okwa popi kutya oku na ofamili hayi mu yambidhidha mokusila oshisho aanona ye omanga ta kongo iilonga.“Ondi na aanona yaali nofamili yandje otayi kwathelendje mokuya palutha. Oyuuviteko onkalo yandje, ihe kandi shi kutya sigo uunake taya vulu okukala taya kwathelendje okutekula aanona yandje. Ondi na einekelo okumona iilonga nokusila oshisho ofamili yandje.”Aalumentu mboka oya popi kutya oya pyakudhukwa okulonga iilonga kehe na oya pula woo elelo lyomukunda gwawo li konge oompito dhokunana aapunguli.Momwedhi Kotomba gwomvula ya piti, sho a pulwa kombinga yonkalo yompumbwe yiilonga oshowo enano lyaapunguli momudhingoloko ngoka, Omunambelewa Omukuluntu gwelelo lyomukunda gwaDivundu, Athanasius Maghumbo okwa popi kutya elelo lyawo epe natango na otaya kambadhala okupitila miikundaneki okunana aapunguli opo ya vule okupungula mehala ndyoka.Okwa popi kutya oya mona aapunguli mboka ya holola ohokwe na oya ninga omaindilo kelelo lyomukunda ngoka, nomaindilo gawo otaga talwa.Omunambelewa ngoka okwa popi kutya omukunda gwawo ogwa gumwa woo konkalo yeliko lyankundipala, ndjoka tayi yi woo moshipala egandjo lyomayakulo unene ngaashi okuwapaleka omahala gomavi, omolwa ompumbwe yiiyemo. Sho a pulwa kutya omukunda ngoka otagu ningwa uunake ondoolopa, noonkambadhala dha shike dha ningwa po, Maghumbo okwa popi kutya ngashiingeyi oyiipyakidhila manga nokugandja omagumbo oshowo omayakulo galwe kaakalimo momukunda ngoka.KENYA KAMBOWE

Ya hala iilonga

Comments

Namibian Sun 2025-07-01

Please login to leave a comment

Ya hala iilonga

Comments

Namibian Sun 2025-07-01

Please login to leave a comment

Login