Ya ehamekwa pethimbo lyolukongo wonkoshi

Amalia Sheya, omunaimvo 51 oshowo Festus Fredricks, omunamimvo 29, okwa lopotwa ya ehamekwa pethimbo aanambelewa yopolisi, oshowo aanambelewa yetanga lyegameno pamwe naanambelewa yegameno lyomakuti mboka yali taya umbu onkoshi ndjoka kwa lopotwa yi li pomudhingoloko ngoka.Olukongo lwonkoshi ndjoka olwa tameke konima sho kwa lopotwa kutya onkoshi oya ponokele omunamimvo 49 omulithi gwiimuna, Elia Usiku ongula yOlyomakaya pUulungawakolondo.Okwa falwa meendelelo koshipangelo shOnandjokwe Lutheran opo a ka mone epango na okwa lundululilwa moshipangelo shaShakati pamwe naantu yaali mboka ya yahwa.Onzo oya notheleko oNamibian Sun kutya Usiku okwa ehamekwa noonkondo konkoshi na okwa teka woo okwaako. Pahapu dha Shipanga Andreas, lwopotundi onti 09:00, omanga a li ta hingi tayi kohambo ye okwa adha Usiku a landula iimuna ye yuuka ketambi. Usiku okwa li ta tika ombinzi noonkondo nokonima sho yemu lombwele shoka sha holoka po oye u fala koshipangelo shaNandjokwe.“Okwe tu lombwele kutya okwa ponokelwa konkoshi. Okwa ehamekwa noonkondo kokwaako kokolumoho oshowo oku na iipogololo yomayego molutu lwe amuhe. Konima sho twe mu fala koshipangelo otwa tseyithile woo opolisi,” Andreas a popi. Pahapu dhamwene gwohambo, Jesaya Angula, inaya nongela ngele momudhingoloko moka omu na oonkoshi molwaashoka oha kala konyala ethimbo alihe mohambo.Omunambelewa omupopiliko gwopolisi yaShana, Frieda Ashiyana, okwa koleke kutya oya lopotelwa oshiningwanima shoka, na okwa tulwa miilonga olukongo lwonkoshi ndjoka.“Molyomakaya lwopotundi onti 10:00 olukongo lwonkoshi olwa tameke lwa kwatelwa mo komeho kaanambelewa yopolisi yatatu, aakwiita yatatu oshowo aanambelewa yaali yuuministeli womidhingoloko ayehe ya homata oondjembo. Oya yi molukongo lwonkoshi ndjoka kwa lopotwa ya ponokele omukwashigwana ongula yesiku ndyoka.”“Ayehe oya li mohauto yoToyota Land Cruiser yuuministeli womidhingoloko na oya li pamwe naFredricks, omunahambo ngoka a li te ya ulikile pehala mpoka pwa monika onkoshi ndjoka,” Ashiyana a popi.“Konima sho ya mono onkoshi oya li ya lya moonyandi noonkondo na oye ya tayi tondoka yuuka kohauto, yahala okulonda mohauto. Shoka osha thiminike aapolisi oshowo aakwiita ya tameke taya umbu, na Sheya okwa ehamekwa koondjamama dhokolulyo omanga Fredricks eehamekwa kepepe lyokolumoho. Ayehe otaya pangwa moshipangelo shaShakati.” Iikolokosha pokati kaantu niiyamakuti ya londo pombandaOsha lopotwa muJanuari kutya iipotha yomiyonena pokati kaantu niiyamakuti oya londa pombanda na okwa lopotwa iipotha yi li po 8 067 moNamibia momvula yo 2017.Iipotha mbyoka oya londo pombanda noonkondo okuza momvula yo 2004 moka mwa li mwa lopotwa iipotha yi li po 2 936. Momvula yo 2016 iipotha mbyoka oyi li po 6 331, nuuyelele mboka owa hololwa molopota tayi ithanwa 2017 State of Community Conservation in Namibia. Momvula yo 2017 okwa lopotwa omaponokelo ge li 106 pandjele yaantu 0.2 mehala kehe lyiiyamakuti lya gamenwa.Ondjele yiinamwenyo mbyoka ya ponokelwa oyi li po 91.1 omanga omapya ga yonagulwa ge li po 13.1, momvula yo 2017. Momvula yo 2014, sho omahala giinamwenyo ga gamenwa geli po 82 ga ningilwa omakonaakono, okwa lopotwa iipotha yi li po 7 774, nomvula ndjoka oyo owala omvula kwa li kwa lopotwa iipotha mbyoka momahala ge vulithe po 80.Nonando ongaaka iipotha yi li po 9 228 oya lopotwa mo 2013, momahala ge li po 79 sho kwa ningwa omakonaakono. Olopota oya holola kutya oshitopolwa shaZambezi osho shi na iipotha oyindji ya lopotwa momvula yo 2017, moka oondjamba odho dhi li ponomola yotango niipotha 380 omanga iikolokosha 200 ya etithwa koongandu, niikolokosha 180 oya etithwa kuuyandje. Moshitopolwa Erongo oshowo Kunene omwa lopotwa iikolokosha ya thika o 700 mbyoka ya etitha kuuyandje, iipotha 590 oya etitha koongwe omanga yi li po 400 ya etithwa koondjamba. Olopota oya holola kutya iipotha yiikolokosha yi li pe 160 oya lopotwa moKunene oshowo mErongo, noopesenda 8 dhoonkoshi odha dhipagwa. ILENI NANDJATO

Ya ehamekwa pethimbo lyolukongo wonkoshi

Comments

Namibian Sun 2025-05-05

Please login to leave a comment

Ya ehamekwa pethimbo lyolukongo wonkoshi

Comments

Namibian Sun 2025-05-05

Please login to leave a comment

Login