Uule woomvula 19 taya hupu metoto lyiiyagaya

Ompumbwe yiilonga oya thiminike aalumentu naakiintu mOshakati ya kale taya ilikolele omboloto mokukonga iinima mbyoka hayi vulu okulongululwa okuza komatoto giiyagaya.

Yamwe oya kala nokulonga iilonga mbyoka uule woomvula 19.

Oshifokundaneki shoNamibian Sun osha kala ongula yEtiyali petoto lyiiyagaya ndyoka tali adhika pondje yondoolopa yaShakati, nokuya moonkundatana naakwashigwana aalumentu naakiintu mboka taya kongo uuhupilo mokukonga iinima mbyoka hayi vulu okulongululwa okuza metoto ndyoka. Ohaya uhala omasiku gawo goshiwike ketoto ndyoka taya gongele iinima mbyoka nokuyitula mooshako nokuyigandja kaalandi yawo mboka haye ya futu kehulilo lyomwedhi. Oya popi kutya ohaya futwa oshimaliwa shooN$100 motona yimwe yomakende ga tatulwa oshowo N$45 moshako yimwe yoondooha dho aluminium oshowo N$20 moshako yoondooha dhoka kadhi shi o aluminium.

Oya popi kutya ohashi ya kutha omasiku gatatu nenge gatano okuudha oshako yimwe yomaheke ngoka ga tatuka. Sigriti Bernard (49), Hendrina Nangolo (47) naKapuka Jeremia (49) oya popi kutya mbyoka oya kala iilonga yawo uule woomvula 19 monena. Oya popi kutya oluhepo nokwaahena iilonga itaku kondjithwa kwaamboka yeli omutumba momagumbo, ihe okwaamboka taya kondjo.

Sho a hokolola nkene a tameke, Bernard okwa popi kutya ota dhimbuluka sho a li ha landa oshako ndjoka onene koostola kondando yooN$1 na oha yi nayo a ka toole iinima ketoto.

Bernard okwa popi kutya nonando iiyemo mbyoka ha ningi kayi shi oyindji, okwe shi pondola okulanda iipeleki ye nokudhengela ombashu ye. “Kakele kiipeleki mbyoka twa landa niimaliwa mbyoka, ope na omaliko gamwe ngoka twa landa niimaliwa oyo tuu mbika. Onda longitha iimaliwa mbyoka mokutuma aanona yandje kooskola oshowo okuya landa iikulya pamwe naanegumbo lyandje.” Nangolo okwati, oluhepo lwaandjawo oshowo onkalo kutya ina hala okuninga owala omunwi gwomalovu, osho shemuthiminike a kale ta longo iilonga mbyoka, yokugongela iinima mbyoka hayi vulu okulongululwa.

Lahia David (36) okwa popi kutya oya hala ya kale haya futwa iimaliwa oyindji omolwa okulonga kwawo nuudhiginini, sho taya gongele iinima mbyoka nokutatula omakende. Mboka oya popi kutya ohaya longele momutenya na otashi kala oshiwanawa uuna taya longele momuzile.

Oya popi kutya omukundu ya taalela, aantu mboka haya yakapo iinima yawo. Oya ti, momahuliloshiwike aantu ye na oohauto oha yayi metoto moka nokulondekapo iinima yawo mbyoka ya gongela.

Oya tsikile kutya oya nongele oshindji pethimbo lyoshigongi iilonga shoka sha ningwa kelelo lyondoolopa yaShakati.

“Inatu kala tu shi shi ngele omukalo ngoka hatu longitha ogwa za mopula, sho hatu tatula omakende noonyala nani ope na omashina ngoka haga longo iilonga mbyoka. Otu na einekelo kutya limwe lyomomasiku otatu ka pewa eshina ndyoka nokukala tatu longo iilonga yetu nenyanyu,”Jeremia ta ti

Ongundu ndjoka oya popi woo nkene haya kala yuuvite uuna yiitsu mekende mondoolopa.

“Ngele onda mono ekende nena ohashi dhimbulukithandje iilonga yandje, ngele inandi humbata sha nena ohandi li toolapo nokulifaalela ketoto, opo ndi ke li tatulepo,”Paulina Thomas ta ti.

Ayehe oya popi kutya kaye na omakende nenge oondooha dhili popepi nomagumbo gawo molwaashoka otadhi nyateke na oya pula Aanamibia ayehe ya kaleke omidhingoloko dha yela.

KENYA KAMBOWE