Utoni a tululula omahewa ge

Ombudsman John Walters okwa popi kutya otashi ulike kutya uuministeli womavi nomatulululo owa ndopa okutseyithila oonakuninga eindilo mboka inaya pitamo moshihogololitho kutya omolwa shike uuminiteli wa tokola okugandja ofaalama yoFarm Felseneck No.26 oshowo Okanatjikuma No.26 kehangano lyedhina Passions Culinary and Hospitality Institute CC.

Walters okwa mono omanyenyeto okuza kaaningi yomaindilo mboka inaya za mo moshihogololitho, pethimbo a li ningi oonkundathana dhopashitopolwa kombinga yoprograma yepangelo yomatulululo, konima owala yethimbo efupi omanga inaku ningwa Omutumba gwEvi Omutiyali mOshilongo.

Okwa popi kutya Minista Utoni Nujoma pampango okuuthwa a gandje omatompelo ketokolo lye kwaayehe mboka ya li ya ningi omaindilo ihe inaya za mo.

“Aantu olundji kaye shi uuthemba wawo. Oveta otayi utha minista opo a shangele oonakukutha ombinga momaindio ayehe mboka inaya za mo nokuya tseyithila kombinga yetokolo lye ndoka a ningi.”

Sophia Basson, omukalimo gwomoKahandja, mwene gwehangano Sobas Investments CC ogumwe gwomwaamboka ya gandja omanyenyeto gawo kombudsman, oshowo kuNujoma.

Farm Felseneck oya li ya tseyithwa momvula yo 2013 kutya otayi tulwa momusholondondo gwoofaalama dhoka tadhi tulululwa aantu ihe oya li ya kuthwa mo momusholondondo inaku gandjwa omatompelo.

Sho ya tseyithwa ishewe momvula yo 2016, Basson ngoka e na ontseyo yopombanda moshikondo shomatalelepo nomayakulo gaayenda okwa ningi eindilo ihe ina mona eyamukulo, na okwa nyenyeta kuNujoma, Ngoloneya gwaTjozondjupa, Otto Iipinge oshowo Omupresidede Hage Geingob ta popi kutya ina mona eyamukulo okuza kombelewa yomatulululo gevi yopashitopolwa shaTjozondupa.

Ina mona eyamukulo okuza kuGeingob na okwa popi kutya egandjo lyofaalama ndjoka inali ningwa pauyuuki.

Ehangano lyokuteleka lya pewa ofaalama

Oofaalama ndhoka dhuunene woohecta 4829.24 otadhi adhika oshinano shookilometa 45 pondje yondoolopa yaKahandja na odhi li popepi nofaalama yopaumwene yErindi private game reserve.

Oofaalama ndhoka odha gandjwa kehangano lyedhina Passions Culinary and Hospitality Institute CC.

Ooyene yehangano ndyoka lyoPassions Culinary oyo Valerie Aron e na mo uumwene woopresenda 30, Jona Levi (30%), Niklaas Steenkamp (20%) oshowo Veripurua Katjatenja (20%).

Aron oku li mayola nale gwondoolopa yaKahandja ngoka kwa hololwa kutya okuume kominista yomavi.

Levi oku li omuteleki a tseyika nawa koyendji ngoka kwa hololwa a kala nokumona ootendela dhokuteleka odhindji okuza kepangelo na okwa kala woo ta longele mokefe yiikulya yoPaliamende uule woomvula dha thika puntano.

Steenkamp okuli omupeha mayola nale gwondoolopa yaKahandja, ngoka a longa pethimbo lyelelo lyaAron.

Uuyelele wehangano ndyoka mboka tawu adhika kehangano lyoBusiness and Intellectual Property Authority (Bipa) owa holola kutya Levi oye mwene gwehangano ndyoka nomuniipambuluko moPassions Culinary.

Ofaalama ya pewa aakengeli

Shoka osha etitha ehwahwameko lyoLandless People's Movement (LPM) li popye kutya ehangano ndyoka olya longitha okugandja po ofaalama kaakengeli, mboka taya ipe owala omavi guunafaalama.

Aron, okwa popi kutya uumwene wehangano ndyoka owa lundulukwa ta popi kutya ngashiingeyi ehangano ndyoka oli na ooyene ye li yane.

Levi okwa koleke omapopyo gaArona, ta popi kutya okwa tokola okuninga omalunduliko nokugwedha mo aaniipambuluko yamwe mehangano, opo a vule okutalwa ngele ta ningi eindilo lyomatulululo, konima sho a kala nokuninga omaindilo okuza momvula yo 2011.

Nonando ongaaka omalunduluko ngoka taya popi itaga holoka mondjokonona yuuyelele wehangano ndyoka, koBipa company.

“Otashi ende ngiini ehangano lyokuteleka li mone ofaalama? Ehangano lyokuteleka otali ka longitha shike oshitopolwa shoka ashihe shevi?” Oshilyo shimwe shehwahwameko lyoLPM sha pula.

Aron okwa popi kutya ehangano lyawo olya pewa ofaalama konima sho lya ningi eindilo, na okwa ekelehi omapopyo kutya oya pewa ofaalama ndjoka molwaashoka oku li ehewa lyaNujoma.

CATHERINE SASMAN