UDF ota ka tokola ngele ota hogolola Geingob

Elelo epe lyOngudu yoUnited Democratic Front’s (UDF) olya ti otali ka tokola ngele otali ka longitha omayele gOmupresidende Omukulu gwongudu, opo ongudu yi hogolole Omupresident gwOngudu yoSwapo Hage Geingob, momahogololo guupresidende ngoka taga ningwa mo-2014. Kuyele nuumvo Omupresidende-nale gwongudu ndjoka Chief Justus //Garoëb okwa pula aapopi yElaka lyOshidamara moNamibia mwa kwatelwa aayambidhidhi yoUDF ya yambidhidhe Geingob molwaashoka anuwa oku li omupopi gwOshidamara. Omupresidende-nale gwoUDF oku li woo omuleli gwaaDamara. Moshipopiwa she shoka shi liwe ompinge nasho kuyamwepo //Garoëb okwati “Tse oUDF otwa tokola okuyambidhidha Hage Geingob molwaashoka oku li Omudamara. Aawambo oya lela oshilongo shika uulethimbo. Ethimbo olya thikana opo omuhoko gumwe moshilongo gu lele oshilongo molwaashoka oshilongo oshAanamibia ayehe na ka shi shi owala shAawambo”. Pethimbo mpoka //Garoëb a ningi omapopyo ngoka omuhepa-presidende opo a hogololwa, a li nale amushanga-ndjai gwongudu ndjoka Dudu Murorua okwa kaleke ongudu yawo kokule nomapopyo ga//Garoëb’s ta ti iilyo yawo itayi ka hogolola Geingob, ihe ohela Murorua okwa popi oohapu dha yooloka ku ndhoka a popile nale konima sho a pulwa ngele ongudu yawo otayi ka ninga etokolo kombinga yoshikumungu shoka. “Ina tu tokola natango. Otwa tegelela tu gongale nokuninga etokolo moshikumungu shoka,” Murorua ta ti. Omapopyo gomuleli gwAadamara oge etitha Geingob opo a pule Aadamara ye mu hogolole owala uuna yemwiinekela kutya otaka kala omuleli omwaanawa ihe haku muhogolola molwaashoka oku li oshitopolwa shomuhoko gwawo. Geingob okwa li a ningi omapopyo ngoka pethimbo a ningwa naye oonkundathana kopolograma yo ‘Prime Minister’s Question Time’ koTV yoNamibian Broadcasting Corporation. Ewawa lyAanyasha mOngudu yoSwapo nalyo olya wayimine oompata na olya nyana omapopyo ga//Garoëb. Ewawa ndyoka olya ti itali popile aanapolitika mongudu kehe yopolitika moshilongo mwa kwatelwa oSwapo mboka taya hwahwameke uukwamuhoko mokati koshigwana. Pethimbo lyoKongressa yongudu yoUDF ya ningilwa moKhorixas mOshitopolwa shaKunene ehuliloshiwike lya piti, // Garoëb okwa pingenwa po ku Apius !Auxab naashika osha kolekwa kuMurorua ngoka a ti //Garoëb okwa yi moshipundi shevululuko. //Garoëb okwa lela oUDF konima nkene ya totwa po mo-1989 nongudu oye shi pondola oku mona oshipundi mopaliamende omolwa eyambidhidho enene okuza mOshitopolwa shErongo naKunene. //Garoëb okwa wayimine opolitika mo1971 onga oshilyo shoDamara Council (DC) nomo-1977 okwa ningi omunashipundi gwoDC. Mo-1980 okwa lundululile oDC mongudu yopolitika nokonima okwa toto po oUDF mo-1989.