Ta futitha epangelo oomiliyona 1.4

JANA-MARI SMITH OVENDUKA Frederik Petrus Fridel ota pula ompangu opo yi zimine a futwe oshimaliwa shomiliyona yimwe omolwa efufu lye lyokomutse ndyoka lya tetwako shaaheli pahalo lye modholongo. Fridel ota pula woo natango a futwe oshimaliwa shooN$400 000 omolwa euvo lyonayi ndyoka eetelwa koshiningwanima shoka. Omunadholongo ngoka ta longelepo egeelo lyoomvula 35 medhipago lyomukandhona gwe, ota popi kutya uuthemba we owa yi wa pondje muFebruali gwo 2018 sho aanambelewa aakaleli yoodholongo ye mu kwata nokutetako efufu lye ndyoka a hungu, omolwa eitaalo lye lyuuRastafarian omanga e li mondjeedhililo. Okwa popi kutya shoka ohe muuvitha nayi noonkondo. “Osha kutha Frederik oomvula odhindji okuhunga efufu ndyoka nokuli sila oshisho, neteteko lyefufu lye olya lundulula uukwatya we onga omuntu gweitaalo lyuuRastafarian na otashi ka kutha ethimbo ele efufu lye opo li vule okuthika mpoka lya li nale,” omikanda dhompangu dha holola. Ota longelepo egeeelo lye mEndiki lyOdholongo yaHardap, shalandula sho a pewa egeelo lyoomvula 35 omolwa oshipotha shedhipago lyomukadhona gwe, ndyoka lya ningilwa moRosh Pinah momvula yo 2012. Nakusa okwa tsuwa iikando 27. Okwa popi kutya muFebruali gwo 2018 aanambelewa aakeleli yoodholongo oye mu kutha nokumufala kondunda yimwe hoka a lombwelwa kutya omafufu omale inaga pitikwa modholongo pamilandu dhodholongo. Okwa popi kutya aanambelelwa mboka oye mukwata koonkondo nokutetako efufu lye. Omikanda dhuumbangi dha gandjwa kaanambelewa aakeleli yoodholongo odha holola kutya Frederik okwa tameke oku totapo oongudhu inadhi pitikwa modholongo, na ota kondjitha aanadholongo ya hunge omafufu gawo onga oshitopolwa shokuulika egamombinga lyawo kongundu ye. Uumbangi owa holola kutya omafufu omale inaga pitikwa kwiikwatelelwa kontopolwa onti 30 yoNamibian Correctional Services Act. Aanambelewa oya popi kutya, Frederik okwa li e na omafufu omafupi sho a pewa egeelo lye omvula yo 2015. Mesiku ndyoka taku popiwa kutya okwa kululwa, aanambelewa oya popi kutya oya yakula olopota kutya ope na mboka yali taya hili omakaya inaga pitikwa, naasho ya yi ya ka konaakone, Frederik kali a hala okulongela kumwe. “Okwa tsikile nokwiinomena aanadholongo yakwawo kutya ye okwa simana na ina hala okuungaunga naanambelewa yoonkatu dhopevi,” Warrant Officer Jackson Nghitoteiwa a shanga momukanda gwe gwuumbangi. Omunambelewa okwa popi kutya ye pamwe naanambelewa yakwawo oya kutha moFrederik mondunda yawo nokumu dhimbulukitha kutya omafufu omale inaga pitikwa modholongo, na okwa pulwa a teteko omafufu ge nenge ga tetweko ihe okwa tindi. Sho aanambelewa ya teteko etata lyomafufu ngoka, Frederik okwa tokola okulandula shoka a lombwelwa na okwa yi kondunda ye.Omushangwa gwaWarrant Officer Gideon Kauko Nambahu, nagwo ogwa tsu kumwe nehokololo ndyoka. Hahende, Titus Mbaeva oye takalelepo Frederik, omanga epangelo lya kalelwa po kuMonique Meyer gwOffice of the Government Attorney. Oshiwike sha piti, omupanguli mOmpangu yoPombanda, Nate Ndauendapo okwa undulile oshipotha shoka komasiku 16 gaJuni.

Ta futitha epangelo oomiliyona 1.4

Comments

Namibian Sun 2025-12-16

Please login to leave a comment

Ta futitha epangelo oomiliyona 1.4

Comments

Namibian Sun 2025-12-16

Please login to leave a comment

Subscription Required to Access Content ×

Login

Subscription Required to Access Content