Swapo a tamekitha omahwahwameko ge mOhangwena

Ongundu yoSwapo oya tamekitha iikonga yomahogololo mOshikandjohogololo shaHangwena mOshitopolwa shaHangwena omolwa omahogololo ngoka taga ningwa moshikandjohogololo shoka momwedhi ta twaalela. Sho a popitha aayambidhidhi yongundu ndjoka, pethimbo lyoshigongi shoka sha ningilwa moHelao Nafidi mOlyomakaya, Amushanga-Ndjai gwoSwapo, Nangolo Mbumba, okwa kunkilile aayambidhidhi mboka ya longe neitulemo opo ya adhe esindano momasiku gatano gaAguste. Okwati, kashi na shoka tashi kwatha okukala omuyambidhidhi gwoSwapo ngele omuyambidhidhi ngoka ina ishangitha opo a kahogolole. Mbumba okwa gunu mboka taya e ta etopokauko moshilongo, na okwa pula uukumwe, eyambidhidho lyepangelo meyambulepo lyoshilongo na okwa gandja woo olupandu kuNamibia ngoka ta longitha uundemokoli ta ti kutya, shoka oshi li oshiholelwa oshiwanawa kiilongo yaAfrika. Sho uulike omuhogololwa gwongundu yawo, Mbumba okwa pula aayambidhidhi ngele oye shi tuu Johannes Hakanyome, ngoka e li omuulikwa gawo na ngele oye mu hala tuu onga kansela gwawo omupe. Omahogololo ngoka otaga ningwa sha landula eso lyakansela nale, Maria Kombwana. Mbumba okwa popi woo kombinga yomahogololo gopashigwana ngoka taga ningwa moshilongo momwedhi Novemba ta ti kutya, Hage Geingob oye ta kalele po ongundu tayi pangele momahogololo guupresidende ngoka taga ningwa. Okwati, ope na aantu yamwe mboka yahala okuya mopaliamende kokatekete koSwapo, ihe kaye na shoka ya longela ongundu. “Opo wu vule okuya mopaliamende kokatekete koSwapo, ouna okukala wa longela ongundu uuwanawa ngoye ouna woo okukala oshilyo hashi dhiginine iifuta yasho yuukwashilyo uule woomvula dha thika pomulongo. Ku na okukala wuna ondjokonona yiimbuluma, ngoye owuna woo okukala wiishangitha onga omuhogololi,” Mbumba ta ti. Okwa popi kutya pokati kOmupresidende Hifikepunye Pohamba nOmupilima minista Hage Geingob, ope na gumwe taka popitha oshigongi shoSwapo moshikandjohogololo shoka omanga omahogololo guukansela inaga ningwa. Sho a popi poshigongi sha faathana minista Erkki Nghimtina okwati, Ongundu yoSwapo oya kala nokusindana po omahogololo ngoka ga zi nokuningwa molwaashoka kehe gumwe mongundu moka okushi iinakugwanithwa ye. Mayola-ndjai nale gwEtanga lyEgameno lyaNamibia Peter Nambundunga, na ye okwa popi woo poshigongi shoka na okwa pula aayambidhidhi yongundu yiikaleke kokule niikolokosha pethimbo lyomahwahwameko gomahogololo. Oshigongi shoka osha kaliwa woo kOmukwaniilwa gUukwanyama Kuku Martha Nelumbu oshowo aapeha minista Elia Kaiyambo naPetrina Haingura, oshowo omunapolitika Kanana Nghishoono mwakwatelwa ookansela yiikandjohogololo ya yooloka moshitopolwa shaHangwena. HELAO NAFIDI PLACIDO HILUKILWA