Swapo a kanitha oshipotha shomoHelao Nafidi

Ongundu yoSwapo oya kanitha oshipotha shimwe natango, sho omupeha omupanguli Hosea Angula a ningi etokolo li li muuwanawa wakansela ngoka a li a kuthwa oshipundi melelo lyondoolopa ndjoka sha landula omahogololo ngoka ga ningwa mo-2015.

Angula oshiwike shika okwa kaleleke etokolo ndyoka lya ningwa kongundu yoSwapo opo yi kuthe melelo lyaHelao Nafidi, Ester Ndatala Nghidimbwa.

Pethimbo a ningi etokolo lye, Angula okwa popi kutya Swwapo okwa yi pondje omilandu dhuuyuki, sho ina ningila Nghidimbwa omutumba opo a vule okutseyithilwa etokolo ndyoka lya ningwa.

Nghidimbwa okwa li a ganithilwa oshinakugwanithwa shuukansela melelo ndyoka pehala lyokandidate Lucia Nghililewanga, konima yomahogololo ngoka ga ningwa muNovemba gwo 2015.

Momasiku ga 8 gaAguste mo-2016 Swapo okwa tokola opo

Nghidimbwa a kuthwe oshinakugwanithwa shoka konima sho ya mono kutya okwa li a kutha ombinga momahogololo gomalelo giitopolwa ihe kage shi gelelo lyondoolopa.

Nghidimbwa okwa tokola okufala ongundu yoSwapo kompangu ta pataneke ekutho lye miilonga.

Okwa popi kutya etokolo ndyoka lya ningwa kuamushanga gwongundu yoSwapo, Nangolo Mbumba kali li pauyuuki.

Okwa popi kutya ina pewa ompito yomutumba gwontumba a vule okugandja omaiyuvo ge.

Oonakufalwa kompangu oyo Ongundu yoSwapo, amushanga gwoSwapo Nangolo Mbumba, elelo lyoHelao Nafidi town , mayola gwoHelao Nafidi Eliaser Nghipangelwa, Lucia Nghililewanga oshowo ECN .

Omupanguli okwa pula woo oonakufalwa kompangu ya fute iifuta yopaveta mwakwatela mbyoka ya nakufala kompangu oshipotha shoka. Henry Shimutwikeni okwa kalelepo, Nghidimbwa, omanga Advocate Gerson Hinda naDirk Conradie ya kalelepo oonakufalwa kompangu.



KENYA KAMBOWE