Shilimela oha longitha oomiliyona mbali mokukaleka po omadhagadhaga ge

ILENI NANDJATO OSHIGAMBO Banda Shilimela, ngoka e li gumwe gwomaanangeshefa aanene moNamibia, okwa popi kutya oha longitha oomiliyona mbali kehe omwedhi opo a kalekepo omadhagadhaga ge geli gane. Opo a shunithe pevi omwaalu gwiimaliwa mbyoka ha longitha momadhagadhaga ngoka, okwa ningipo ehala lye lyokukankameka omadhagadhaga ngoka pegumbo lye lyokomukunda tali adhika mOshigambo moshitopolwa shaShikoto. Shilimela okuli omukomeho gwomahangano geli 39 taga adhika miilongo itano. “Ngame omunangeshefa nda pondola na ongame owala monooli yoshilongo tandi longo woo moshikondo shomatukodhila.” “Opo wu pondeole owa pumbwa okulonga naatseyinawa molwaashoka oshikondo shomatukodhila oshipe kaaludhe. Shika itashi ti otandi itula pevi, ihe omolwaashoka onda hala okuya pombanda.” Omunangeshefa goka e na omadhagadhaga gatatu moNamibia omanga limwe Ii li moDemocratic Republic of Congo, okwa popi kutya omadhagadhaga ge ohaga longithwa megameno, ihe ohaga vulu woo okuhiilwa mokulongitha momayakulo gamwe, ngaashi uunafaalama.Shilimela okwa popi kutya opo omuntu a kale nomadhagadhaga okwa pumbwa okukala e na iimaliwa molwaashoka ohaga pula oshimaliwa oshindji. “Oshikondo shomatukodhila kashi shi sha kehe gumwe omolwa iifuta yi li pombanda. Konyala ohandi longitha oshimaliwa shooN$500 000 kehe omwedhi medhagadhaga limwe, mwakwatelwa okukankama, aahingi, omahooli oshowo ekalekepo lyomadhagadhaga ngoka.” “Sho nda landa edhagadhaga lyandje lyotango oomvula dha piti, onda li handi li kankameke petungo lyandje pOniipa, ihe shoka kashi li momulandu gwoshikondo shomatukodhila, ondeli tembulile kokapale. Omilandu dhoshikondo shomatukodhila odha yaga komuntu noyendji itaya hupu molwaashoka ngele oto dhi landula nena otashi ti owu na okulongitha iimaliwa.” Pauyelele mboka wa gandjwa koNamibia Civil Aviation Authority (NCAA), okapale komatukodhila kopaumwene otaka vulu okuningwa kehe pamwe na itashi pula eziminino, ihe oka pumbwa okushangithwa. NCAA okwa gwedha po kutya ope na uupale womatukodhila wathika po 300 miitopolwa shaShana, OShikoto, Omusati oshowo Ohangwena. Shilimela okwa popi kutya okulongitha uupale woodhila wopashigwana, ohashi futilwa iimaliwa oyindji mokunambela puupale mboka nokutuka okuza puupale mboka, nokutotapo okapale koye mwene osha pumbwa woo aatseyinawa moshikondo.

Shilimela oha longitha oomiliyona mbali mokukaleka po omadhagadhaga ge

Comments

Namibian Sun 2025-05-02

Please login to leave a comment

Shilimela oha longitha oomiliyona mbali mokukaleka po omadhagadhaga ge

Comments

Namibian Sun 2025-05-02

Please login to leave a comment

Login