'Oto teya shoka wa kunu'

Aamwayinathana yaali ya za momukunda Utokota moshitopolwa shaKavango East, oya pula aanafaalama yakwawo ya longe nuudhiginini momapya gawo gomahangu, sha landula omuloka omuwanawa.

Itaya popile woo omukalo gwokukala aantu yiikolelela miikulya mbyoka hayi gandjwa kepangelo, taya popi kutya iikulya mbyoka ohayi ya omalupita, na itayi vulu okulanditha opo omuntu a vule iimonene sha shomondjato.

Innocentia Kavindama oshowo Fabianus Linyando oya adhika taya limi mepya lyawo kEwi lyaNooli.

Mboka oya holola kutya kaye na iilonga nonkalamwenyo oye ya dhigupalele oomvula mbali dha piti omolwa onkalo yoshikukuta ndjoka ya etitha ya taya hupu moondya dhoshikukuta okuza kepangelo.

Innocentia okwa popi kutya okusila oshisho aantu 13 omanga ku na iilonga oshinima oshidhigu noonkondo.

Okwa popi kutya oya kala nokumona omahangu oshowo epungu okuza mepya lyawo, ihe ngashiingeyi onkalo oya dhigupala omolwa oshikukuta.

Okwa popi kutya oondya dhoshikukuta dhoka ya mono okuza kepangelo odhe ya kwathela.

Innocentia okwa popi kutya omuloka ngoka taya mono moKavango ngashiingeyi oguli eyambeko.

Fabianus okwa lombwele Namibian Sun kutya okwiikolelela koondya dhoshikukuta itaku hwahwameke iilonga.

“Onda mona kutya aantu yamwe inaya tameka natango okulima omapya gawo molwaashoka oya igilila onkalo yokupewa oondya dhoshali. Natse otwa mona ngaa iikulya mbyoka ihe kashi shi oshiwanawa.”

Okwa yelitha kutya uuna omunafaalama a mono eteyo ewanawa ota vulu okutokola okulanditha po iilya ye yimwe, opo a vule okwiimonena iimaliwa.

Aanafaalama monooli yoshilongo oya gumwa noonkondo koshikukuta uule woomvula mbaali dha piti.

KENYA KAMBOWE