Oshipotha shedhipago lyaMukwiilongo otashi tameke

Oshipotha tashi tamanekelwa aafakelwa yahamano, mboka ya tulwa miipandeko momvula yo 2017 shi na sha ekwatathano nedhipago lyangoloneya nale gwaMusati, Leonard Nangolo Mukwiilongo, otashi tameke mEtine mOmpangulilo yoPombanda mOshakati.

Mboka otaya tamanekelwa eponokelo lyaMukwiilongo ngoka a li omunamivo 92 pethimbo ndyoka sha ningwa momasiku 11 Apilili 2017 pegumbo lye pwElim.Mboka otaku popiwa ya monitha iihuna omukokele ngoka sho taya pula ooshapi dhoshiketha she shokupungula na okwa hulitha omolwa eehameko ndyoka a ningilwa. Oshipotha osha li shi na okutameka mOmaandaha ihe osha undulilwa kEtine okugandja ethimbo kepangeo opo li vule okuya mekwatathano noombangi. Stefanus Nampala, Willen Nakale, Tomas Amwele, Abraham Ashipena, Joram Hafeni oshowo Evalistus Shilongo Shituki okwa tegelelwa ya holoke komeho yomupanguli Johanna Salionga.Otaya pangulilwa oshipotha shedhipago, omuyeka kwa homatiwa oshowo okukala niilwitho oshowo iikuti shaaheli paveta.Omukalelipo gwepangelo moshipotha, Ruben Shileka okwa pula omupanguli Salionga opo uundulile oshipotha shoka kEtine ta popi kutya epangelo olya pumbwa ethimbo opo li ninge ekwatathano noombangi, omanga aakalelipo yopaveta moshipotha itaya ka vula okukalapo omathimbo gamwe oshiwike shika. Mukwiilongo okwa hulitha momasiku 25 gaMei momvula yo 2017, moshipangelo shopaumwene moka a kala uule konyala womwedhi e li monkalo ombwiinayi sha landula oshiponokela. Pahapu dhomona, Tshatipamba, aalumentu yahamano ya homata oya thiki pegumbo lyahe momasiku 11 gaApilii lwopotundi onti 11:00 na oya adha Mukwiilongo nomuniilonga gwomegumbo ya kuutumba pondje. Aafekelwa mboka ye ya kondjitha ya ye megumbo na oya pula iimaliwa. Tshatipamba okwa popi kutya aalumenu mboka oya manga he komeho opamwe nomuniilonga na oya pula ooshapi dhokoshiketha shokupungula. Mukwiilongo okwa tindi okugandja ooshapi ndhoka. Oya kutha oonayilona noku dhi hwikwa nokumonitha ngoloneya nale iihuna na oye mu dhenge woo nombistoli momutse. Konima sho ya ndopa okumona ooshapi oya patele Mukwiilongo mondunda pamwe nomuniilonga na oya kambadhala okuya ontuku noshiketha shokupungula.

Oshiketha shoka osha li oshidhigu na omanga taya kambadhala okushi londeka mehauto lyawo omuniilonga okwa pondola okwiimangulula nokumangulula Mukwiilongo na okwa pitile mekende opo a ka konge ekwatho, sho ya mono omuniilonga ta tondoka oshiketha oye shi thigi po na oya yi ontuku. Aafekelwa yane oya tulwa miipandeko muMei gwo 2017 na oya holoka momapangu yamangestrata gwaShakati.

Pethimbo ndyoka Nakale okwa li mondjeedhililo mOvenduka moshipotha shimwe sha landula etulo lye miipandeko omanga Shituki a li ta kongwa natango. Nampala ota kalelwapo kuSimson Aingura, omanga Marcia Amupolo ta kalelepo Nakale.

Amwele oshowo Shituki otaya kalelwapo kuPetrina Hango, omanga Melvin Nyambe ta kalelepo Shipena. Hafeni ota kalelwapo kuTuwilika Shailemo.

ILENI NANDJATO