Oshipopiwa shangoloneya tashi konenenwa

Okwa popi kutya epangelo olya longitha iimaliwa ya thika konyala poomiliyona 700 metungo lyooployeka dhomayambulepo moshitopolwa. Sho a yi moonkundathana noshifokundaneki shoNamibian Sun sha landula oshipopiwa sha ngoloneya omukuluntuskola poskola yOpevi yaKahao, Immanuel Amutenya okwa pula kutya omolwashike ngoloneya ina popya kombinga yopoloyeka yOskola yOpevi yaKahao yongushu yoomiliyona 17 ndjoka yali yi na okukala ya manithwa oomvula mbali dha piti.

Amutenya okwa popi kutya monena otaya longele moongulu dha kulupa mehala lyongeleka, na otashi lulumike noonkondo sho ya tegelela natango opo oskola ompe yi manithwe. Omvula ya piti uuminiteli wElongo owa popi kutya omutungi ngoka a li ta tungu oskola ndjoka okwa kuthwa iilonga molwa iilonga yi na ongushu.

Epangelo olya tseyitha kutya okwa ulikwa omutungi omupe ngoka gwa tegelelwa a manithe opoloyeka ndjoka.

Etungo lyehala lyokukala aakiintu mboka ya tegelela okupulumutha mOutapi oyimwe yomoopoloyeka ndhoka dha konenenwa koshigwana. Aakwashigwana oya pula kutya ngoloneya okwa ningi po shike opo a kwashilipaleke kutya omukundu ngoka ogwa kandulwa po. Omunambelewa gumwe gwomOmusati ngoka ina hala okutumbulwa kedhina okwa popi kutya oshipopiwa shangoloneya kashi na uuyelele owundji. Omunambelewa ngoka okwa popi a gandja oshiholelwa shoombelewa oonene dhOpolisi yaMusati ndhoka dha li dhi na okukala dha manithwa okutungwa andola momwedhi Malista gwo-2015 ihe inadhi pwa natango.

Ngoloneya okwa tumbula owala oombelewa ndhoka onga oshitopolwa shoopoloyeka ndhoka dha tulwa miilonga omvula ya piti, ihe opoloyeka ndjoka oya li yi na okupwa momvula yo-2015.”

KENYA KAMBOWE





KENYA KAMBOWE