Opoloyeka yemino lyomongwa mUuvudhiya ya tindwa

Aakwashigwana yomOshikandjohogololo shaUuvudhiya mOshitopolwa shaShana, oya sindanapo olugodhi ndoka lwa li ompinge netulo miilonga opoloyeka yokumina omongwa mekango lyomongwa tali ithanwa Otjivalunda moshikandjohogololo shawo. Aakwashigwana mboka oya nyanyukwa noonkondo konima sho ya tseyithilwa mOlyomakaya kutya opoloyeka ndjoka oya tindwa kuuministeli. Opoloyeka ndjoka oya li ya yambidhidhwa kElelo lyoPamuthigululwakalo lyUukwambi oshowo lyAndonga. Ehangano lyaSouth Afrika olya yi metsokumwe nElelo lyaNdonga oshowow elelo lyUukwambi opo ku minwe omongwa okuza mekango lyaOtjivalunda, kakele ombapila ndjoka ya shangelwa ehangano lyoGecko Namibia kukOmufala gwOmidhingoloko Teofilus Nghitila okwa gandja omatompelo gathika pugaheyali kutya omolwashike opoloyeka ndjoka itayi vulu okuya komeho. Omatompelo ga gandjwa ongaashi kutya ekango ndyoka oli li onzo yaakwashigwana, na oli li onzo ya gamenwa paushitwe. Opoloyeka ndjoka okwa hololwa kutya otayi ka etithwa uudhila oshowo iishitwa yilwe yi tembuke okuza mehala moka. Komufala gwOmidhingoloko okwa popi woo kutya ehala ndyoka oli li lya simana pandondo yopauyuni nge tashi komidhingoloko dhongushu nodha gamenwa. Ombapila oya popi kutya, emino lyomongwa ngoka otali ka etitha embugaleko oshowo omaupyakadhi galwe gopamidhingoloko ngoka itaga vulu okukandulwapo kaantu. Etompelo limwe ndyoka lya etitha opo opoloyeka ndjoka yi tindwe ooshoka kutya oya tindwa na itayi popilwa komiyalu omunene gwaakwashigwana. Ompango yEgameno lyOmidhingoloko yomomvula yo-2007, otayi utha opo kugamenenwepo oonzo dhopaushitwe. Iilyo yo Iipumbu Ya Shilongo Conservancy oshowo nokomitiye yOtjivalunda oya holola enyanyu lyawo sho opoloyeka ndjoka ya kalekwa. Oya holola kutya etokolo ndyoka lya ningwa kepangelo ewanawa noonkondo na olya tula woo miilonga omaiyuvo gaakwashigwana. Aakwashigwana mboka oya kala ye li ompinge nopoloyeka ndjoka. Pahapu Thomas Nambambi, ngoka e li omupopiliko gwaamboka ya kala itaya popile opoloyeka okwa popi kutya opoloyeka ndjoka andola oya yonagula uushitwe. Ekango ndyoka olya kala onga onzo yiiyemo yaakwashigwana yomuhoko gwAakwambi oshowo Aandonga uule womimvo odhindji dha piti. Omongwa ogwa longithwa mepingakanitho lyiipumbiwa oshowo iimuna. UUVUDHIYA PLACIDO HILUKILWA